Արամ Ա կաթողիկոսն իր օրհնությունն է փոխանցել իրանահայերին
23-06-2009 23:00:00 | Լիբանան | Քաղաքական
ԱՆԹԻԼԻԱՍ, 23 ՀՈՒՆԻՍԻ, ՆՈՅՅԱՆ ՏԱՊԱՆ: Մեծի Տանն Կիլիկիո Արամ
Ա կաթողիկոսը հունիսի 20-ին հեռախոսազրույց է ունեցել Թեհրանի
հայոց թեմի առաջնորդ Սեպուհ արքեպիսկոպոս Սարգսյանի հետ` մոտիկից
ծանոթանալու Իրանում ստեղծված իրավիճակին, հատկապես պատկերացնելու
դրա ունեցած հետեւանքները հայ համայնքի վրա:
Ինչպես հայտնում են Անթիլիասի մայրավանքից, Առաջնորդ Սրբազանը
հայտնել է, որ իրանահայ համայնքը վնաս չի կրել ո'չ Թեհրանում, ո'չ
Սպահանում եւ ո'չ էլ այլ քաղաքներում: Իրանահայերը շարունակում են
մնալ կազմակերպված ու աչալուրջ, եւ ուշադրությամբ հետեւում են
քաղաքական զարգացումներին: Վեհափառ Հայրապետը Սեպուհ Սրբազանին
հանձնարարել է իր հայրական օրհնությունը փոխանցել Սպահանի եւ
Թավրիզի հոգեւոր առաջնորդներին ու ամբողջ Իրանի հայությանը:
Հիշեցնենք, որ Արամ Ա կաթողիկոսն այս օրերին գտնվում է
Հռոմում` Մեծ ութնյակի գագաթաժողովին նախորդող կրոնապետների հատուկ
համագումարին մասնակցելու նպատակով: