Արդարադատության նախարարի տեղակալ Սրբուհի Գալյանի մասնակցությամբ այսօր տեղի է ունեցել «Հակակոռուպցիոն  կոմիտեի մասին» օրենքի նախագծի հանրային քննարկման և Հակակոռուպցիոն ռազմավարության ու դրա իրականացման 2019-2022 թթ. միջոցառումների ծրագրով 2019 թվականին կատարված աշխատանքների հանրային մշտադիտարկման արդյունքների ամփոփման աշխատաժողով:

 

Այն կազմակերպվել էր «Իրավաբանների հայկական ասոցիացիա» հասարակական կազմակերպության և Հայաստանի քաղաքացիական հասարակությունների հակակոռուպցիոն կոալիցիայի կողմից:

 

Բացման խոսքում փոխնախարար Գայլանը շնորհակալություն է հայտնել բոլոր մասնակիցներին քննարկմանը ներկա գտնվելու և հակակոռուպցիոն քաղաքականության մշակման գործընթացին շարունակական հետաքրքրություն ցուցաբերելու համար՝ հատկապես ընգծելով գործընկեր հասարակական կազմակերպությունների ընդդիմախոսական կեցվածքի կարևորությունը՝ որպես քաղաքականություն մշակող մարմնի զգոնության խթան: Անդրադառնալով կոռուպցիոն հանցագործությունների քննություն իրականացնող մարմնի ստեղծման գործընթացին՝ Սրբուհի Գալյանը կարևորել է, որ ոլորտը կարգավորող օրենսդրական ակտերն ընդունվեն հնարավորին մասնակցային և ներառական գործընթացի արդյունքում՝ այդպիսով ապահովելով Հակակոռուպցիոն կոմիտեի գործունեության նկատմամբ հանրային լայն վստահություն:

 

Աշխատաժողովի ընթացքում փոխնախարար Գալյանը քննարկման մասնակիցներին  ներկայացրել է «Հակակոռուպցիոն կոմիտեի մասին» օրենքի նախագծով սահմանված իրավակարգավորումները: Մասնավորապես՝ անդրադարձել է Կոմիտեի ձևավորմանը, նախագահի ընտրության մեխանիզմին, գործունեությանը, աշխատակիցների սոցիալական երաշխիքներին, Կոմիտեի հաշվետվողականությանը ԱԺ-ին, Կոմիտեի ծառայողների ընտրության բարեվարքության ստուգման մեխանիզմներին, ինչպես նաև օրենքի նախագծի անցումային դրույթներով սահմանված այլ կարգավորումներին: 

Այնուհետև, հաջորդել է մասնակիցների և փոխնախարարի միջև հարցուպատասխանը: 

 

Աշխատաժողովի հաջորդ փուլում Արդարադատության նախարարության աշխատակազմի  Հակակոռուպցիոն քաղաքականության մշակման բաժնի պետ Մարիամ Գալստյանը մասնակիցներին ներկայացրել է Հակակոռուպցիոն ռազմավարության ու դրա իրականացման 2019-2022 թթ. միջոցառումների ծրագրով 2019 թվականին կատարած աշխատանքների հանրային մշտադիտարկման արդյունքների ամփոփումը:

 

 ՀՀ ԱՆ տեղեկատվության և հասարակայնության

 հետ կապերի վարչություն

 

Նոյյան տապան  -   Մամլո հաղորդագրություն