2009թ.-ի հունվար-մայիսին նախորդ տարվա համեմատ Հայաստանի
ՀՆԱ-ն 15,7%-ով նվազել է
19-06-2009 18:00:00 | Հայաստան | Տնտեսություն
ԵՐԵՎԱՆ, 19 ՀՈՒՆԻՍ, ՆՈՅՅԱՆ ՏԱՊԱՆ: 2009թ.-ի հունվար-մայիսին
Հայաստանի իրական ՀՆԱ-ն կազմել է նախորդ տարվա նույն
ժամանակահատվածի մեծության 84,3%-ը (այսինքն` նվազել է 15,7%-ով)
եւ կազմել 839 մլրդ 356 մլն դրամ (ավելի քան 2 մլրդ 439 մլն ԱՄՆ
դոլար` հաշվարկված հունվար-ապրիլի 1 դոլարի դիմաց 344,31 դրամ
միջին փոխարժեքով): ՀՆԱ-ի ինդեքս-դեֆլյատորը կազմել է 101,4%:
ՀՀ Ազգային վիճակագրական ծառայության տվյալներով, նախորդ
տարվա նույն ամիսների համեմատ այս տարվա հունվար-մայիսին
հանրապետությունում արդյունաբերական արտադրանքի ծավալը նվազել է
10,5%-ով եւ կազմել 226 մլրդ 890 մլն դրամ:
Գյուղատնտեսության համախառն արտադրանքը նվազել է 2.9%-ով եւ
կազմել 81 մլրդ 129 մլն դրամ, շինարարության ծավալը նվազել է
56,1%-ով եւ կազմել 72 մլրդ 971 մլն դրամ, մանրածախ
առեւտրաշրջանառությունն աճել է 0,2%-ով եւ կազմել 335 մլրդ 508 մլն
դրամ, իսկ ծառայությունների ծավալը (առանց առեւտրի)` նվազել
1,7%-ով եւ կազմել 274 մլրդ 733 մլն դրամ:
ՀՀ արտաքին առեւտրաշրջանառության ծավալը նախորդ տարվա
հունվար-մայիսի համեմատ նվազել է 33,7%-ով եւ կազմել 1 մլրդ 312
մլն մլն դոլար: Ընդ որում, արտահանումը նվազել է 47,8%-ով եւ
կազմել 220,1 մլն դոլար, իսկ ներմուծումը` նվազել է 29,9%-ով եւ
կազմել 1 մլրդ 92 մլն դոլար: Մայիսին արտաքին
առեւտրաշրջանառությունը կազմել է ապրիլի ծավալի 84,1%-ը, ընդ
որում, ներմուծումը` համապատասխանաբար, 83,8%:
2009թ.-ի հունվար-մայիսին սպառողական ապրանքների գները
2008թ.-ի նույն ամիսների համեմատ աճել են 2,5%-ով, իսկ
արդյունաբերական արտադրանքի գները նվազել են 4,3%-ով:
Այս տարվա մայիսի վերջին նախորդ տարվա նույն ամսվա համեմատ
պաշտոնապես գրանցված գործազուրկների թվաքանակը աճել է 9,8%-ով եւ
կազմել 83,9 հազար մարդ:
Այս տարվա հունվար-մայիսին միջին ամսական անվանական
աշխատավարձը կազմել է 97 527 դրամ (նախորդ տարվա նույն
ժամանակահատվածի համեմատ աճել է 13,4%-ով), այդ թվում` պետական
հատվածում` 80 857 դրամ (աճել է 17,6%-ով), ոչ պետական հատվածում`
121 990 դրամ (աճել է 7,9%-ով):