Արցախի Հանրապետությունը լիարժեքորեն ապահովում է մեր պարենային անվտանգությունը. արագ փչացող սննդի կարիք չկա. ԱՀ գյուղնախարար
02-10-2020 15:01:56 | Արցախ (ԼՂՀ) | Հասարակություն
Արցախի Հանրապետությունը լիարժեքորեն ապահովում է մեր պարենային անվտանգությունը, որևէ խնդիր պարենի մասով չկա:
Այս մասին տեղեկացնում է Արցախի Հանրապետության գյուղատնտեսության նախարար Աշոտ Բախշյանը:
Ըստ նրա՝ այս պահին միայն պահեստավորում են չփչացող ապրանքներ՝ ջուր, ծխախոտ, պահածոներ՝ տարհանված բնակիչների, կամավորների կարիքները հոգալու համար:
«Արդեն իսկ դրամային առումով մոտ 200 մլն դրամի չափով միայն պարենային մթերքի մասով օգնություն են ցուցաբերել մեր սփյուռքահայ հայրենակիցները բոլոր երկրներից»,- նշեց Ա. Բախշյանը՝ հորդորելով արագ փչացող սնունդ չպաշարել և չուղարկել Արցախ:
Նախարարի փոխանցմամբ՝ բոլոր հացի փռերը, ալրաղացները և վերամշակող ձեռնարկություններն աշխատում են անխափան.
«Մենք զբաղվում ենք նաև բնականոն աշխատանքներով, իրականացնում ենք խաղողի մթերում՝ հաշվի առնելով, որ սեզոնն է, և առաջիկայում կպլանավորենք նաև գյուղատնտեսական աշխատանքների իրականացում»: