ԵՐԵՎԱՆ, 24 ՄԱՐՏԻ, ՆՈՅՅԱՆ ՏԱՊԱՆ: Մարտի 24-ին ժամը 17-ին «Փյունիկ» ակումբի մարզադաշտում առաջին պարապմունքը կսկսի Հայաստանի ֆուտբոլի ազգային հավաքականը: Հայաստանի ընտրանին նախապատրաստվում է Երեւանի հանրապետական մարզադաշտում մարտի 28-ին աշխարհի գավաթի խաղարկության ընտրական փուլի ծրագրով Էստոնիայի թիմի հետ կայանալիք հանդիպմանը: Հյուրերը Երեւան կժամանեն մարտի 25-ին: Հայաստանի հավաքականի գլխավոր մարզիչ Յան Պոուլսենը թիմ է հրավիրել 19 խաղացողի (7-ը` արտերկրից): Խմբային մրցաշարում Հայաստանի հավաքականն անցկացրած բոլոր 4 խաղերում պարտություն է կրել եւ գտնվում է վերջին` 6-րդ տեղում: Էստոնացիներն ունեն 1 միավոր: Պատասխան հանդիպումը նշանակված է ապրիլի 1-ին Տալլինում:

---