Երևանում կայացել է միջազգային գիտամեթոդական համաժողով՝ նվիրված Սերգեյ Օժեգովի ծննդյան 120-ամյակին
07-12-2020 10:40:22 | Հայաստան | Մամլո հաղորդագրություն
2020 թվականի դեկտեմբերի 3-4-ին Երևանում Վ. Բրյուսովի անվան պետական համալսարանում կայացավ միջազգային գիտամեթոդական համաժողով՝ նվիրված ռուս լեզվաբան, բառարանագիր և ուղղագրագետ (լեքսիկոգրաֆ) «Ռուսաց լեզվի բացատրական բառարանի» հեղինակ Սերգեյ Օժեգովի ծննդյան 120-ամյակին :
Համաժողովի կազմակերպիչներն էին Երևանում Ռուսաստանի գիտության և մշակույթի կենտրոնը և Վ. Բրյուսովի անվան պետական համալսարանը: Սերգեյ Օժեգովի ծննդյան 120-ամյակին նվիրված երկօրյա համաժողովը իրականացվեց Համալսարանի 85–ամյա հոբելյանի տոնական միջոցառումների շրջանակում:
Միջազգային համաժողովին մասնակցություն ունեցան Ռուսաստանի Դաշնությունից և Հայաստանի Հանրապետությունից հեղինակավոր գիտնական-լեզվաբաններ, Հայաստանի առաջատար բուհերի դասախոսներ, դպրոցի ուսուցիչներ և ուսանողներ:
Պլենար սեկցիայի հանդիսավոր բացման ընթացքում մասնակիցներին ողջունեցին Վ.Բրյուսովի անվան պետական համալսարանի ռեկտոր, ֆիզիկա-մաթեմատիկական գիտությունների թեկնածու Կարինե Հարությունյանը, Երևանում Ռուսաստանի գիտության և մշակույթի կենտրոնի ղեկավարի պաշտոնակատար Ացամազ Բիչենովը, «Դոմ Մոսկվի» Երևանում մոսկովյան մշակութագործարարական կենտրոնի տնօրեն Վահրամ Կարապետյանը և միջոցառման համակարգող՝ Վ. Բրյուսովի անվան պետական համալսարանի Ռուսաց լեզվի և օտար լեզուների ֆակուլտետի դեկան, մանկավարժական գիտությունների դոկտոր, պրոֆեսոր Նինա Տատկալոն:
Համաժողովի ծրագիրը ներառում էր 4 սեսիա.
1.Ս.Ի. Օժեգովը և նրա «Ռուսաց լեզվի բառարանը» ռուսագիտության պատմության ընթացքում և լեզվական գիտելիքների զարգացման արդի փուլում,
2.Ռուսաց լեզվի նորագույն բառարանների ներկայացում իրենց հեղինակների մասնակցությամբ,
3.Ռուսական դպրոցներում կրթական գործընթացներում ռուսաց լեզվի տպագիր և էլեկտրոնային բառարանների գործնական կիրառման հնարավորությունների ներկայացում,
4.Հայաստանի գիտնականները ռուսաց լեզվի և ռուս գրականության մասին։
Գիտաժողովի սեսիաների ընթացքում հետաքրքիր օնլայն դասախոսություններով հանդես եկան ռուսաստանյան գիտնականները, ՀՀ և Արցախի տարբեր բուհերի՝ Վ. Բրյուսովի անվան ՊՀ, ԵՊՀ, ՌՀՀ, Ստեփանակերտի Մեսրոպ Մաշտոց համալսարանի ներկայացուցիչները։ Լեզվաբան-գիտնականները ներկայացրեցին հետաքրքիր և արդիական թեմաներով զեկույցներ, որոնց թեզիսները շուտով կհրատարակվեն գիտական ժողովածուում։
Երկօրյա գիտաժողովն ավարտվեց Կլոր սեղան-քննարկմամբ՝ նվիրված Հայաստանում ռուսաց լեզվի դասավանդման հիմնախնդիրներին։ Գիտաժողովի բոլոր մասնակիցներին շնորհվեցին մասնակցության վկայականներ։
ՀԱՅԵՐԵՆ
Русский
English
Դաս. հայերեն
French
