ՀԿԵ շարժակազմը կհամալրվի ուղևորատար երկու նոր էլեկտրագնացքներով և 27 վագոնով
12-03-2021 13:40:42 | Հայաստան | Հասարակություն
Հարավկովկասյան երկաթուղու շարժակազմը շուտով կհամալրվի «Տրանսմաշհոլդինգի» արտադրության ուղևորատար երկու նոր էլեկտրագնացքներով ու 27 վագոնով:
Նոր ուղևորատար վագոնները, որոնք սպասարկելու են միջազգային ուղղությունը, Հայաստան են բերվելու այս տարվա մայիս-հունիսին, իսկ ներհանրապետական երթուղիների համար նախատեսված նոր էլեկտրագնացքները՝ մինչև օգոստոսի 1-ը:
Նոր շարժակազմը «Տրանսմաշհոլդինգի» ամենաժամանակակից սերիական արտադրանքն է, որը համապատասխանում է ուղևորափոխադրումների հարմարավետության և անվտանգության բոլոր պահանջներին:
ԷՊ2Դ էլեկտրագնացքները հագեցած են անվտանգության պասիվ համակարգերով, հատուկ միկրոկլիմայի ապահովման համակարգով, օդի ախտահանման մոդուլներով և էկոլոգիապես մաքուր զուգարանային սարքավորումներով:
Ուղևորատար վագոններում կգործեն վաճառքի ավտոմատներ և սուրճի ապարատներ: Վագոնները հագեցած են էլեկտրական վարդակներով կամ USB միակցիչներով, ինչպես նաև զուգարանային համալիրներով` ցնցուղախցիկներով և խմելու ջրի ապարատներով: