Հայաստանի ԿԲ-ն վերաֆինանսավորման տոկոսադրույքը նվազեցրեց
0,25%-ով եւ սահմանեց 7%
14-01-2009 20:00:00 | Հայաստան | Տնտեսություն
ԵՐԵՎԱՆ, 14 ՀՈՒՆՎԱՐԻ, ՆՈՅՅԱՆ ՏԱՊԱՆ: 2009թ.-ի հունվարի 13-ի
նիստում ՀՀ Կենտրոնական բանկի խորհուրդը 0,25%-ով նվազեցրել է
վերաֆինանսավորման տոկոսադրույքը` սահմանելով այն 7%:
Ըստ ՀՀ ԿԲ-ի հասարակայնության հետ կապերի ծառայության,
2008թ.-ի դեկտեմբերին նոյեմբերի նկատմամբ արձանագրվել է ընդամենը
0,1% գնաճ, որի պարագայում 12-ամսյա գնաճը նվազել է 1,4%-ով եւ
կազմել 5,2%: Գնաճի նպատակային թիրախային ցուցանիշն ապահովվել է:
ԿԲ-ի խորհուրդը արձանագրել է, որ պայմանավորված համաշխարհային
տնտեսական աճի տեմպերի կրճատման պահպանվող միտումներով 2008թ.-ի
դեկտեմբերին արտաքին գնաճային ճնշումները շարունակել են թուլանալ:
Այս զարգացումները շարունակել են արտահայտվել պարենային եւ ոչ
պարենային ապրանքների ներքին շուկաներում` հանգեցնելով ընդհանուր
գնաճի տեմպերի էական նվազման:
Ըստ ԿԲ-ի խորհրդի, չնայած արտաքին եւ ներքին հետագա
զարգացումներում առկա անորոշություններին, համաշխարհային
պահանջարկի կրճատման հետեւանքով ձեւավորված արտաքին գնանկումային
միջավայրը եւ վերջինիս ազդեցությունը ներքին գների վրա պահպանվելու
է նաեւ կանխատեսվող ժամանակահատվածում, որի պարագայում գնաճի
տեմպերի նվազումը կրելու է շարունակական բնույթ: Այս պարագայում
ԿԲ-ի խորհուրդը նպատակահարմար է գտել շարունակել դրամավարկային
պայմանների թուլացման քաղաքականությունը` նպաստելով երկարաժամկետ
հատվածում տնտեսական աճի տեմպերի պահպանմանը: