Լևոն Արոնյանը ՖԻԴԵ-ի կայքում արդեն ներկայացված է ԱՄՆ դրոշի ներքո

01-12-2021 19:10:58 | Հայաստան | Սպորտ

Շախմատի միջազգային ֆեդերացիան հրապարակել է շախմատիստների ամենամսյա դասակարգման աղյուսակը։ Գրոսմայստեր Լևոն Արոնյանն աղյուսակում 6-րդն է (2772): Ի դեպ, նշենք, որ ՖԻԴԵ-ի կայքում Արոնյանի տվյալներն արդեն փոխվել են. նա ներկայացնում է ԱՄՆ շախմատային ֆեդերացիան, գրում է Panorama.am-ը:

ՖԻԴԵ-ի 100 լավագույն շախմատիստների աղյուսակում Հայաստանից Գաբրիել Սարգսյանը 54-րդն է (2681), Հրանտ Մելքումյանը՝ 99-րդը (2649)։ Ամերիկահայ Սամուել Սևյանը 49-րդն է (2684)։

ՖԻԴԵ-ի աղյուսակի առաջին հորիզոնականում Մագնուս Կարլսենն է (2856, Նորվեգիա), այնուհետև՝ Ալիռեզա Ֆիրուջա (2804, Ֆրանսիա), Դին Լիրեն (2799, Չինաստան), Ֆաբիանո Կարուանա (2792, ԱՄՆ), Յան Նեպոմնյաշչի (2782, Ռուսաստան):

Հիշեցնենք, որ ավելի վաղ Լևոն Արոնյանը հանդես էր եկել հայտարարությամբ, որում մասնավորապես նշել էր. «Մեկ տարուց ավելի ներկայիս կառավարության խոստումների իրագործմանը սպասելուց հետո հասկացա, որ ստիպված եմ կայացնել բեկումնային որոշում և հեռանալ հարազատ երկրից: ...

Տարիներ շարունակ ես տարբեր երկրներից հանդես գալու բազմաթիվ գրավիչ առաջարկներ եմ ստացել: Այդ թվում, ամերիկացի մեծ բարերար և շախմատի սիրահար Ռեքս Սինկեֆելդի կողմից, որն ամեն տարի կրկնում էր Միացյալ Նահանագներ տեղափոխվելու իր առաջարկը: Ես ամեն անգամ մերժումս հիմնավորում էի նրանով, որ այն ինչ արվում էր իմ պետության կողմից շախմատի զարգացման համար անգնահատելի էր, և որ ոչ մի նյութական արժեք չէր կարող համեմատվել այն հարգանքի հետ, որ վայելում էր շախմատիստը Հայաստանում:

Ուզում եմ երախտագիտությունս հայտնել հարգարժան Ռեքս Սինկեֆելդին, որ այսօր էլ շարունակում է հավատալ ինձ: Շնորհակալ եմ նաև Ֆաբիանո Կարուանային, ով լինելով Ամերիկայի ուժեղագույն խաղացողը, աջակցում է ինձ և կիսում թիմակիցներ լինելու որոշումս»:

Նոյյան տապան - Սպորտ