«Արարատից Սիոն» ֆիլմը ներկայացնում է Ավետյաց երկրի մինչ
այժմ անհայտ` հայկական պատմությունը
05-05-2010 21:30:00 | Հայաստան | Մշակույթ
ԵՐԵՎԱՆ, 5 ՄԱՅԻՍԻ, ՆՈՅՅԱՆ ՏԱՊԱՆ-ՀԱՅԵՐՆ ԱՅՍՕՐ: ՎիվաՍել-ՄՏՍ-ը
շարունակում է կյանքի կոչել իր առաքելությունը` հովանավորելով հայ
ժողովրդի պատմությունը աշխարհին ներկայացնող մշակութային
նախագծերը: Որպես «Արարատից Սիոն» ֆիլմի հայաստանյան ցուցադրության
հովանավոր, ընկերությունը հատկացրեց 10 միլիոն դրամ:
Մայիսի 5-ին «Մոսկվա» կինոթատրոնի ճեմասրահում տեղի ունեցավ
մամուլի ասուլիս` նվիրված «Վէմ մեդիա արուեստներ» ստուդիայի
նկարահանած «Արարատից Սիոն» վավերագրական ֆիլմի հայաստանյան
պրեմիերային: Բանախոսեցին ֆիլմի կինոռեժիսոր Էդգար Բաղդասարյանը,
պրոդյուսեր եւ սցենարի հեղինակ տեր Մեսրոպ քհն Արամյանը, գլխավոր
օպերատոր Ռուբեն Գասպարյանը, ինչպես նաեւ` ֆիլմի հովանավորներից
ՎիվաՍել-ՄՏՍ ընկերության գլխավոր տնօրեն Ռալֆ Յիրիկյանը, «Flagship
Ventures» ընկերության տնօրեն Նուբար Աֆեյանը (ԱՄՆ) եւ «Տրոյկա
դիալոգի» տնօրենների խորհրդի նախագահ Ռուբեն Վարդանյանը:
Ֆիլմի պատմության հերոսը հայ ուխտավորն է, ով անցել է կյանքին
սպառնալիքներով լեցուն ճանապարհներով եւ իրեն կոչել «մահտեսի»`
«մահը տեսնող»: Այս մեծագույն հոգեւոր սխրանքի եւ զոհաբերության
շնորհիվ հայերն այսօր աշխարհի կենտրոնում են եւ քրիստոնեական
գլխավոր սրբավայրերի հիմնական իրավատերերից են:
«Ամենուր, որտեղ հայ է եղել, ոսկե հետք է մնացել` շնորհիվ նրա
աշխատանքի եւ մեծ ձեռբերումների»,- ասաց ՎիվաՍել-ՄՏՍ-ի գլխավոր
տնօրեն Ռալֆ Յիրիկյանը:
Պատմական կարեւորագույն երկու` արարման եւ փրկության սարերի
միջեւ հայերի անցած ուղու, մեծագույն հոգեւոր սխրանքի եւ
զոհաբերության մասին պատմող վավերագրական ֆիլմի նկարահանող խմբի
անդամներն ուխտավորների աչքով են տեսել Սուրբ Գերեզման տանող ողջ
ճանապարհը: Վավերագրական ֆիլմը պատկերում է ուխտի ոգին, որը դարերի
ընթացքում կերտեց եւ պահպանեց Սուրբ երկրի սրբատեղիներն ու
վանքերը: Մեծ զոհողությունների եւ տառապանքների գնով ուխտավորները
գալիս էին Սուրբ Երկիր` Աստծո երկրային ներկայությունը զգալու
նպատակով: Կինոնկարում գործածված պատմական տվյալների զգալի մասը
պահպանված չէ հայ պատմագրության մեջ, եւ մեր ինքնության
կարեւորագույն վկայություններ ու նշխարներ ցուցադրվում են առաջին
անգամ:
«Այս ֆիլմը յուրօրինակ ուղերձ է համայն մարդկությանը: Աշխարհի
ազգերը պետք է իմանան, որ դարեր շարունակ քրիստոնեությունը հայի
համար ոչ միայն դավանանք էր, այլեւ աշխարհայացք, ազգային գոյության
հիմք: Հայությունն իր գոյության ողջ ընթացքում ապացուցել է իր
անմնացորդ նվիրվածությունը քրիստոնեական արժեքներին` չնայած բռնի
հավատափոխության փորձերին, ցեղասպանությանը, պետականազրկմանը եւ
ձուլման պարտադրանքին: Ֆիլմը նաեւ ուղերձ է մեզ` ժամանակակիցներս.
մենք պարտավոր ենք լինել մեր նախնիների արժանի հետնորդներ ու
հավատարիմ մնալ մեր դավանանքին` մեր ինքնությանը»,- ավելացրեց Ռալֆ
Յիրիկյանը:
Ֆիլմի նկարահանման նպատակով ստեղծագործական խումբը երեք անգամ
այցելել է Իսրայել եւ մեկական անգամ` Եգիպտոս եւ Թուրքիա: Ֆիլմի
բնօրինակը անգլերենով է, ֆիլմի տեքստը կարդում է մեծանուն
հոլիվուդյան դերասան Էյդան Քուինը: Ֆիլմում հնչում է ժամանակակից
համաշխարհային կինոյի ամենահայտնի երաժիշտներից մեկի` Լիզա
Ջերարդի, ձայնը:
«Արարատից Սիոն» ֆիլմը պատկանելության եւ արժանապատվության
կոչ է հայ մարդուն` դուրս գալու փոքր ազգի բարդույթից եւ սեփական
պատմության տերը դառնալու:
Ֆիլմը մտել է միջազգային ութ կինոփառատոների եզրափակիչ
մրցանակային փուլ: Մայիսի 12-ից Միացյալ Թագավորությունում
կայանալիք համաշխարհային պրեմիերայով սկսվում է ֆիլմի
շրջագայությունը աշխարհում: Ֆիլմը ծրագրվում է ցույց տալ
ամերիկյան, եվրոպական եւ ռուսական խոշորագույն հեռուստաալիքներով: