Անհրաժեշտ է, որ ՄԱԿ-ը ուղղի Ադրբեջանում իր ներկայացուցչի թույլ տված սխալը. Շահան Գանտահարյան
21-03-2022 19:26:01 | Հայաստան | Հարցազրույցներ
«Նոյյան Տապան»-ի զրուցակիցն է Լիբանանի «Ազդակ» օրաթերթի գլխավոր խմբագիր, միջազգայնագետ Շահան Գանտահարյանը։
-Պարոն Գանտահարյան, Հայաստանի Հանրապետության Արտաքին գործերի նախարարությունը Միավորված ազգերի կազմակերպության մշտական համակարգողի պաշտոնակատարին խիստ բողոքի հայտագիր է ներկայացրել Շուշիում Ադրբեջանի ՄԱԿ-ին անդամակցության միջոցառմանը մասնակցելու համար։ Ձեր գնահատականը։
-Կարծում եմ, որ Երեւանի բողոքը օրինաչափ է․ այնպայման պիտի նկատել նաեւ Արցախի Հանրապետության արտգործ նախարարության բողոքը, որ նման գործողությամբ Բաքուն փորձում է օրինականացնել իր բռնագրավումները։ Ադրբեջանում ՄԱԿ-ի ներկայացուցչի կատարած քայլերը միջազգային հանրության ընդհանուր շրջագծում ինքնահակասական բաղադրատարրեր են ներառնում։
Միջազգային ընտանիքը լիազորել է ԵԱՀԿ-ի ՄԽ-ի համանախագահական ձեւաչափը հարցի կարգավորման համար։ Երբ ՄԱԿ-ի անվտանգության մնայուն խորհրդի անդամ երկրներ, որոնք համանախագահում են միջնորդական առաքելությանը հայտարարում են, որ կարգավիճակի խնդիրը չի լուծվել, դա ենթադրում է, որ Շուշիի կարգավորումը եւս ճշտելի է։ Նման քայլով ՄԱԿ-Ի ներկայացուցիչը հակասում է այս դիրքորոշմանը։
Պատահական չէր, որ համանախագահող երկրների Ադրբեջանում հավատարմագրված դեսպանները նախապես մերժեցին գնալ Շուշի, անտեսելով Բաքվի հրավերը։ Սա պարզ փաստ է հակամարտության կարգավորման առկախ լինելու կամ կարգավիճակի հարցի չլուծված լինելու մասին։
Ադրբեջանում ՄԱԿ-ի ներկայացուցիչը սխալ է թույլ տվել, հակասելով միջազգային ընտանիքի լիազորած միջնորդական առաքելության որդեգրած սկզբունքներին եւ հրապարակած հայտարարություններին։ Անհրաժեշտ է, որ ՄԱԿ-ը ուղղի իր ներկայացուցչի թույլ տված սխալը։
ՀԱՅԵՐԵՆ
Русский
English
Դաս. հայերեն
French
