Հայաստանի Հանրապետության և Հնդկաստանի Հանրապետության միջև դիվանագիտական հարաբերությունների հաստատման 30-ամյակ
01-09-2022 09:40:15 | Հայաստան | Մամլո հաղորդագրություն
Օգոստոսի 31-ին նշվում է Հայաստանի Հանրապետության և Հնդկաստանի Հանրապետության միջև դիվանագիտական հարաբերությունների հաստատման 30-ամյակը։
Հայ-հնդկական հազարամյա բարեկամական հարաբերությունները, որոնք հենվում են փոխադարձ բարի կամքի ու հարգանքի վրա, մշտապես եղել են ջերմ և ամուր։ Անցած 30 տարիների ընթացքում Հայաստանի և Հնդկաստանի միջև ձևավորվել են համակողմանի սերտ համագործակցություն և բարձր մակարդակի քաղաքական երկխոսություն:
Մեր երկրները բազմաթիվ միջազգային և տարածաշրջանային խնդիրների շուրջ ունեն ընդհանուր տեսլական և սերտորեն համագործակցում են ինչպես երկկողմ ձևաչափով, այնպես էլ՝ բազմակողմ հարթակներում: Մենք նաև կիսում ենք ժողովրդավարության, մարդու իրավունքների և արդարության համընդհանուր արժեքները։
Վերջին շրջանում տեղի ունեցած բարձր մակարդակի փոխայցելությունները նոր ազդակ են հաղորդել մեր պետությունների միջև հարաբերություններին։
Հայաստանը վերահաստատում է բարեկամ Հնդկաստանի հետ հարաբերություններում առկա ներուժը առավելագույնս իրացնելու ուղղությամբ գործուն քայլեր կատարելու իր պատրաստակամությունը՝ ի շահ մեր երկրների և ժողովուրդների։
ՀԱՅԵՐԵՆ
Русский
English
Դաս. հայերեն
French
