Որևիցե բախումների չենք գնալու. Հանրապետության հրապարակից մի խումբ քաղաքացիներ ավտոերթով շարժվել են դեպի Լաչինի միջանցք
26-12-2022 15:43:03 | Հայաստան | Ի՞նչ է գրում մամուլը
Հայկական ժամանակ. Այսօր մի խումբ քաղաքացիներ Հանրապետության հրապարակից ավտոերթով շարժվել են Գորիս, ապա փորձելու են հասնել Լաչինի միջանցք:
Ակցիայի մասնակիցներից Սամվել Մովսիսյանը նշել է, որ դեռևս 2009 թվականից Արցախում իրականացնում են տարբեր ծրագրեր՝ քաջալերելով արցախցի փոքրիկներին:
«Ամեն տարի մի քանի անգամ այցելում ենք Արցախ, նվերներ ենք տանում փոքրիկներին, փորձում ենք քաջալերել և խրախուսել, որպեսզի երեխաները լավ առաջադիմությամբ սովորեն»,- ասել է նա:
Վերջինիս խոսքով՝ այսօրվա նախաձեռնությունն անվանել են «Ձմեռ պապիկն այցելում է բոլորին». «Հիմա ավտոերթով գնալու ենք Գորիս՝ հանդիպելու այն արցախցի երեխաներին, որոնք այդպես էլ չկարողացան մեկնել Արցախ: Ուզում ենք իրենց քաջալերել, ուրախացնել՝ նվերներ փոխանցել, ճաշել միասին, որից հետո կշարժվենք Լաչինի միջանցք՝ անցակետի հատված, և կփորձենք բանակցել հայ ոստիկանների և ռուս խաղաղապահների հետ: Մենք պարզապես չենք կարող նստել այստեղ ու սպասել, թե ինչ-որ բան կփոխվի»:
Սամվել Մովսիսյանը նկատել է, որ Երևանից շարժվող մեքենաներին ճանապարհից էլի մեքենաներ կմիանան, իսկ որոշները իրենց կսպասեն արդեն անցակետի մոտ:
«Որևիցե բախումների չենք գնալու: Մեր նպատակն է այցելել Արցախ և քաջալերել մեր երեխաներին: Մենք մեր լավագույնը պետք է անենք Արցախի համար: Չենք կարող ասել՝ Արցախը մերն է, սիրում ենք Արցախն ու հանգիստ նստել: Կարծում եմ՝ յուրաքանչյուր հայ, մասնավորապես՝ այս պահին, պետք է իր լավագույնն անի Արցախի համար»,- նշել է նա:
Ակցիայի մասնակիցները լիահույս են, որ Լաչինի միջանցքն այսօր կբացվի, և իրենք կկարողանան հասնել Արցախ:
Հիշեցնենք, որ դեկտեմբերի 12-ից Ադրբեջանը կեղծ բնապահպանական պատրվակով փակել է Արցախը Հայաստանին կապող միակ ճանապարհը՝ Լաչինի միջանցքը:
ՀԱՅԵՐԵՆ
Русский
English
Դաս. հայերեն
French
