ԵՐԵՎԱՆ, 10 ՓԵՏՐՎԱՐԻ, ՆՈՅՅԱՆ ՏԱՊԱՆ: Հայաստանի Մարդու իրավունքների պաշտպան Արմեն Հարությունյանը փետրվարի 10-ի հայտարարությամբ իր մտահոգությունն է հայտնել Հանրային եւ մասնավոր հեռուստաընկերությունների կողմից եթեր հեռարձակվող սերիալների եւ գովազդների որակի ու բովանդակության եւ հատկապես ձեւավորման փուլում գտնվող անչափահասների վրա դրանց բացասական ազդեցության կապակցությամբ: «Ակնհայտ է, որ վերջին ժամանակները հայաստանյան տարբեր հեռուստաալիքներ ցուցադրում են ցածրորակ սերիալներ, որոնք փողոցային ժարգոնով ու հայհոյանքներով են համեմված եւ գովազդում են հանցագործ աշխարհի օրենքներով ապրելը: Չի պահպանվում եթերի գրագիտությունը եւ բարոյականությունը: Մեր հասարակությունը, եւ հատկապես նրա խոցելի խումբ հանդիսացող մեր երեխաները ստիպված են այսօր դիտել գռեհիկ, ապադաստիարակչական հեռուստաարտադրանք, ցինիկ հեռուստագովազդներ»,- ասված է հայտարարությունում: Ըստ Ա.Հարությունյանի, պակաս մտահոգիչ չէ, որ եթերում ցուցադրվում են նաեւ դաժան տեսարաններով եւ բռնություններով լի հեռուստաֆիլմեր, որոնք զուգորդվում են հոգեբանական տեռորով, արժանապատվության վրա հիմնված արժեհամակարգի խարխլումով: Այս ամենը, ինչպես նշում է Մարդու իրավունքների պաշտպանը, բնականաբար ծանր հոգեբանական ազդեցություն է ունենում հատկապես երեխաների վրա, նրանց մեջ սերմանում ընկճվածություն, անելանելիության զգացողություն, անհանդուրժողականություն, ագրեսիվություն եւ այլ բացասական որակներ: «Փաստորեն, բարոյադաստիարակչական ազդեցություն ունենալու, մարդու իրավունքները որպես բարձրագույն արժեք սերունդների մեջ արմատավորելու փոխարեն, նմանատիպ ֆիլմերը, գովազդները ըստ էության հակառակ ազդեցությունն են ունենում: Չկենտրոնանալով որեւէ հետուստաընկերության վրա, որպես օրինակ ցանկանում եմ նշել մամուլում բազմիցս քննարկված «Որբերը» հեռուստասերիալը»,- ասված է Ա.Հարությունյանի հայտարարությունում: ՀՀ Մարդու իրավունքների պաշտպանը կոչ է անում բոլոր հեռուստաընկերություններին եւ նրանց գործունեությունը վերահսկող Հեռուստատեսության եւ ռադիոյի ազգային հանձնաժողովին միջոցներ ձեռնարկել իրավիճակը շտկելու ուղղությամբ:

---