Լավրովը Թուրքիային զգուշացրել է, որ Ուկրաինային զենքի մատակարարումը կարող է բերել բացասական հետևանքներ
10-07-2023 14:45:53 | Հայաստան | Ի՞նչ է գրում մամուլը
Հայկական ժամանակ. Հուլիսի 8-ին Թուրքիայի արտաքին գործերի նախարար Հաքան Ֆիդանը հեռախոսազրույց է ունեցել ԱՄՆ պետքարտուղար Էնթոնի Բլինքենի հետ։
Զրույցի ընթացքում քննարկվել են ՆԱՏՕ-ի ընդլայնումը, Վիլնյուսում կայանալիք ՆԱՏՕ-ի առաջնորդների գագաթնաժողովը, Սիրիային ուղղված ՄԱԿ-ի աջակցության մեխանիզմի ժամկետի երկարաձգումը և Ուկրաինայում տեղի ունեցող վերջին զարգացումները։
Մեկ օր անց՝ հուլիսի 9-ին, Թուրքիայի արտգործնախարար Հաքան Ֆիդանը հեռախոսազրույց է ունեցել ՌԴ արտաքին գործերի նախարար Սերգեյ Լավրովի հետ։
Հեռախոսազրույցի ընթացքում քննարկվել է Ուկրաինայի և Ստամբուլի հացահատիկային համաձայնագրի շրջանակի վերջին զարգացումները։
Ռուսական կողմի հայտարարության համաձայն՝ քննարկվել է նաև «Ազով» գումարտակի հրամանատարների վերադարձը Ուկրաինա։
«Կողմերը մտքեր էին փոխանակել տարածաշրջանային օրակարգի շուրջ՝ շեշտը դնելով Ուկրաինայի շուրջ վերջին զարգացումների վրա, այդ թվում՝ «Ազովի» առաջնորդների՝ Ստամբուլից Կիև վերադարձի հետ կապված իրավիճակի», - ասված է եղել ռուսական կողմի հաղորդագրության մեջ։
Ըստ ՌԴ ԱԳՆ-ի՝ արտգործնախարարները վերահաստատել են Ռուսաստանի և Թուրքիայի միջև «հարաբերությունների վստահության բնույթը պահպանելու և ամրապնդելու» անհրաժեշտությունը՝ երկու երկրների ղեկավարներ Վլադիմիր Պուտինի և Ռեջեփ Թայիփ Էրդողանի պայմանավորվածությունների հիման վրա։ Նաև նշվում է, որ Լավրովն ուշադրություն է հրավիրել Թուրքիայի կողմից Ուկրաինային ռազմական տեխնիկայի մատակարարման վրա, ընգծելով, որ նման քայլերը կարող են հանգեցնել «միայն բացասական հետևանքների»։
Շաբաթ օրը Ուկրաինայի նախագահ Վլադիմիր Զելենսկու հետ Ուկրաինա են վերադարձել «Ազով» գումարտակի 5 հրամանատարներ։ Մարիուպոլի «Ազովստալ» գործարանի պաշտպանները անցյալ տարի հանձնվել էին, իսկ հրամանատարները Թուրքիայի նախագահ Ռեջեփ Էրդողանի միջնորդությամբ տեղափոխվել էին Թուրքիա, որտեղ պետք է մնային մինչև պատերազմի ավարտը։