ԱԺ–ում ընդդիմադիր և իշխանական պատգամավորների միջև վիճաբանություն տեղի ունեցավ
03-10-2023 10:55:23 | Հայաստան | Ի՞նչ է գրում մամուլը
Sputnik. Իշխանական պատգամավորներին պատասխանեց Արծվիկ Մինասյանը` ասելով, որ իշխանությունն իր պատմական տգիտությունը ի ցույց դնելով` փորձում է խեղաթյուրել իրականությունը։
ՀՀ ԱԺ–ում վիճաբանություն տեղի ունեցավ իշխանական և ընդդիմադիր պատգամավորների միջև այն բանից հետո, երբ ՀՀ ԱԺ «Քաղաքացիական պայմանագիր» խմբակցության պատգամավոր Վահագն Ալեքսանյանն իր ելույթում, խոսքն ուղղելով ընդդիմադիր խմբակցություններին, հայտարարեց, որ նրանք են հենց ազգակործանը, կապիտուլյանտը, հողատուն։
«Ես ՀՀ պատգամավոր եմ և ոչ երբեք օտարերկրյա գործակալ, ի տարբերություն շատ շատերի»,– եզրափակեց նա։
Ի պատասխան նրա ելույթի ընդդիմադիր պատգամավորները սկսեցին տեղից պատասխանել և վիճել նրա հետ։
«Զսպեք ձեր էմոցիաները»,– հայտարարեց ՀՀ ԱԺ նախագահ Ալեն Սիմոնյանը։
ՀՀ ԱԺ «Քաղաքացիական պայմանագիր» խմբակցության պատգամավոր Գևորգ Պապոյանի ելույթի ժամանակ նույնպես վիճաբանություն տեղի ունեցավ, երբ իշխանական պատգամավորը հայտարարեց, որ Բաթումի, Ալեքսնդրապոլի պայմանագրի նման Արցախի հանձնման պայմանագիրը հայոց պատմության էջերում մնալու է որպես խարան ընդդիմադիրների դեմքին։
Իշխանական պատգամավորներին իր ելույթով պատասխանեց ՀՀ ԱԺ «Հայաստան» խմբակցության քարտուղար Արծվիկ Մինասյանը` ասելով` իշխանությունն իր պատմական տգիտությունը ի ցույց դնելով` փորձում է խեղաթյուրել իրականությունը։
«Արցախի նախկին նախագահ Արայիկ Հարությունյանը ձեր Նիկոլ Փաշինյանի հետ համագործակցմամբ քանի՞ անգամ է փորձել փախչել Արցախից։ Իսկ այն փրկությունը, որ փորձում էին անել Արցախում, ձեր դավադիր գործողություններով հայաթափեցիք Արցախը»,– հայտարարեց նա։
Հիշեցնենք` Ադրբեջանը սեպտեմբերի 19–ին լայնամասշտաբ հարձակում սկսեց Արցախի դեմ։ Ադրբեջանական ագրեսիայի հետևանքով Արցախը մեկ օրում առնվազն 200 զոհ և ավելի քան 400 վիրավոր տվեց։
Սեպտեմբերի 20–ին Արցախի իշխանությունն ընդունեց կրակի դադարեցման վերաբերյալ առաջարկությունը: Սեպտեմբերի 21–ին Ստեփանակերտի ու Բաքվի ներկայացուցիչները հանդիպեցին Եվլախում, սեպտեմբերի 25–ին` Իվանյանում, սեպտեմբերի 29-ին` կրկին Եվլախում։ Սեպտեմբերի 24-ին սկսվեց արցախցիների բռնի տեղահանումը, նրանք զանգվածաբար լքում են իրենց բնակավայրերը և տեղափոխվում Հայաստան։
Սեպտեմբերի 28–ին Արցախի նախագահ Սամվել Շահրամանյանը հրամանագիր ստորագրեց, ըստ որի` Արցախի Հանրապետությունը 2024 թվականի հունվարի 1-ից կդադարի գոյություն ունենալ։
ՀԱՅԵՐԵՆ
Русский
English
Դաս. հայերեն
French
