Երիտասարդները Հունաստանում գրավել են քաղաքապետարան
17-12-2008 18:55:00 | Հունաստան | Միջազգային
ԱԹԵՆՔ, 17 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ: Հունաստանի
հյուսիս-արեւմուտքում երիտասարդական խմբերը ի նշան բողոքի գրավել
են Յանինա քաղաքի քաղաքապետարանը, ռադիոկայանը եւ մշակութային
կենտրոնը: Այս մասին, ինչպես հաղորդում է ԻՏԱՌ-ՏԱՍՍ-ը, հայտնել է
հունական ոստիկանությունը:
Ըստ ոստիկանության ներկայացուցչի, մոտ 50 երիտասարդներ այսօր
գրավել են քաղաքապետարանի շենքը, որի մոտ ներկա դրությամբ գտնվում
է հատուկ նշանակության երկու ստորաբաժանում, որոնք կոչ են անում
երիտասարդներին հեռանալ տարածքից:
Յանինայի մշակութային կենտրոնը երիտասարդները գրավել են
դեռեւս դեկտեմբերի 16-ին:
Հիշեցնենք, որ դեկտեմբերի 6-ին Աթենքում ոստիկանության եւ
երիտասարդների միջեւ տեղի ունեցած բախման հետեւանքով ոստիկանի
գնդակից զոհվել էր 15-ամյա դեռահաս, ինչն էլ Հունաստանի ողջ
տարածքում անկարգություններով ուղեկցվող բողոքի ակցիաների պատճառ
էր դարձել: