Գերմանիայի իշխանությունները դեռ չեն պատրաստվում ճանաչել Պաղեստինը. Շոլց

25-05-2024 10:48:14 | Հայաստան | Ի՞նչ է գրում մամուլը

Sputnik. Կանցլերի խոսքով՝ անհրաժեշտ է որոշում կայացնել Իսրայելի և պաղեստինցիների միջև բանակցությունների հիման վրա:

Գերմանիայի իշխանությունները դեռ չեն պատրաստվում ճանաչել Պաղեստինը։ Այս մասին լրագրողներին հայտնել է Գերմանիայի կանցլեր Օլաֆ Շոլցը։

«Իմ կարծիքով, այժմ մենք Պաղեստինի ինքնավարությունը որպես առանձին պետություն ճանաչելու պատճառ չունենք։

Հստակություն չկա պետության տարածքի և մնացած բոլոր հարցերի հետ կապված»,-ասել է Շոլցը Պորտուգալիայի վարչապետ Լուիշ Մոնտենեգրոյի հետ բանակցությունների արդյունքներով մամուլի ասուլիսում:

Գերմանիայի կանցլերի կարծիքով՝ Իսրայելի և պաղեստինցիների միջև բանակցությունների հիման վրա պետք է որոշում կայացվի, որը հավասարազոր կլինի երկու պետությունների մասին որոշմանը:

«Խոսքը Պաղեստինի վարչակազմի մասին է, որը պատասխանատու է Արևմտյան ափի և Գազայի հատվածի համար։ Բայց մենք դեռ հեռու ենք դրանից: Այն ամենը, ինչ մենք հիմա պետք է անենք, երկարաժամկետ հրադադարի հասնելն է։ Հարցը նաև այն է, որ բոլոր շահագրգիռ կողմերը պարտավորություն ստանձնեն հավատարիմ մնալ երկու պետությունների մասին որոշմանը», - հավելել Է Շոլցը՝ նշելով, որ պետականության խորհրդանշական ճանաչման ճանապարհը ոչ մի տեղ չի տանի։

Մայիսի 22-ին Նորվեգիան, Իռլանդիան և Իսպանիան հայտարարեցին, որ Պաղեստինը ճանաչում են որպես պետություն, նրանց որոշումները ուժի մեջ կմտնեն մայիսի 28-ին: Մինչև մայիսի 23-ը Պաղեստինը ճանաչում էին ԵՄ 9 երկրներ։ Ութ երկիր ՝ Բուլղարիան, Կիպրոսը, Չեխիան, Հունգարիան, Մալթան, Լեհաստանը, Ռումինիան և Սլովակիան, այդ քայլն արել են 1988 թվականին՝ դեռևս ԵՄ - ին անդամակցելուց առաջ, իսկ Շվեդիան ՝ 2014 թվականին:

Նոյյան տապան - Ի՞նչ է գրում մամուլը

Կարդացել են 619 անգամ

Գերմանիայի իշխանությունները դեռ չեն պատրաստվում ճանաչել Պաղեստինը. Շոլց

Noyan Tapan TV