«ՀԱՅԱՎՏՈԿԱՅԱՐԱՆ» ՓԲԸ-Ն ՆԱԽԱՏԵՍՎՈՒՄ Է ՀԱՆՁՆԵԼ ԿՈՆՑԵՍԻՈՆ
ԿԱՌԱՎԱՐՄԱՆ
29-10-2008 18:00:00 | Հայաստան | Տնտեսություն
ԵՐԵՎԱՆ, 29 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: «Հայավտոկայարան»
ՓԲԸ-ն, որում ընդգրկված են հանրապետության բոլոր ավտոկայարանները,
ավտոկայանները եւ երթակարգավարական կետերը, նախատեսվում է
կոնցեսիոն կառավարման հանձնել միջազգային փորձ ունեցող
ընկերությանը: Սակայն, ինչպես «ՆՈՅՅԱՆ ՏԱՊԱՆ»-ի թղթակցի հետ
զրույցում նշեց «Հայավտոկայարան»-ի տնօրեն Արմեն Հարությունյանը,
մինչ այդ անհրաժեշտ է գոյություն ունեցող 31 ավտոկակայաններում
իրականացնել մի շարք աշխատանքներ` համակարգը ներդրողին գրավիչ
դարձնելու համար: Այդ իսկ պատճառով ներկայումս ընկերությունում
կատարվում են կառուցվածքային բարեփոխումներ, ինչպես նաեւ
նախատեսվում է առաջիկայում ընկերության միջոցների հաշվին կատարել
որոշակի բարեկարգման աշխատանքներ:
Ինչ վերաբերում է ավտոկայարանային համակարգին, ապա ըստ
Ա.Հարությունյանի, այն ներկայումս գտնվում է բավականին անմխիթար
վիճակում. որոշ քաղաքներում դրանք գրեթե չեն էլ գործում: Չկան
անհրաժեշտ պայմաններ թե' վարորդների, թե' ուղեւորների նորմալ
սպասարկումն իրականացնելու համար: Մասնավորապես, բացակայում են
սանիտարահիգիենիկ եւ կենցաղային տարրական պայմանները, խախտվում են
հակահրդեհային նորմերը, չեն գործում սննդի կազմակերպման կետերը,
չեն կատարվում նախաուղերթային զննումներ:
Հանրապետությունում, հիմնականում մայրաքաղաքում, գործում են
նաեւ երթակարգավարական 17 կետեր: Ըստ Ա.Հարությունյանի, այստեղ
նույնպես խնդիր կա, քանի որ դրանց մի մասը գործում է ոչ օրինական
դաշտում եւ տեղակայված է նախարարության կողմից չարտոնված
վայրերում: Բացի այդ, ստուգումները ցույց են տվել, որ
տրանսպորտային միջոցները դեռեւս հաճախ երթուղի են դուրս գալիս
առանց համապատասխան երթակարգավարական ծառայությունում հաշվառման եւ
գրանցման, խախտվում է տոմսավարման սահմանված կարգը, չի
կազմակերպվում տոմսերի նախնական վաճառք եւ այլն: Ներկայումս
աշխատանքներ են տարվում ապօրինի գործող երթագարկավարական կետերը
օրինական դաշտ բերելու ուղղությամբ` դրանք տեղափոխելով գործող
ավտոկայարաններ կամ նախարարության կողմից թույլատրված վայրեր:
Նշվեց նաեւ, որ «Հայավտոկայան»-ը վերջին մեկ ամսվա ընթացքում
մարել է իր ունեցած 29 մլն դրամի պարտքը: Միաժամանակ ընկերությանը
ետ է վերադարձվել ընդհանուր 48 մլն դրամ պարտքից 24 մլն դրամը: