Հայաստանի զինանշանն արտացոլում է հարևանների նկատմամբ տարածքային պահանջներ․ Ադրբեջանի ԱԳՆ
16-05-2025 15:09:46 | Հայաստան | Ի՞նչ է գրում մամուլը
Ազատություն. Պաշտոնական Բաքուն արձագանքել է վարչապետ Նիկոլ Փաշինյանի հայտարարություններին՝ վերստին պնդելով, որ Հայաստանի Հանրապետությունը պետք է փոխի իր Սահմանադրությունը։
«Սահմանադրության փոփոխությունը, որն ուղիղ սպառնալիք է ներկայացնում Ադրբեջանի ազգային անվտանգության համար, խաղաղության հիմնարար պայման է, և Ադրբեջանն ունի այդ պահանջը ներկայացնելու օրինական իրավունք», - հայտարարել է Ադրբեջանի արտգործնախարարության խոսնակ Այխան Հաջիզադեն։
Աշխատանքային այցով Տիրանայում գտնվող վարչապետ Փաշինյանն երեկ Ադրբեջանի հանրային հեռուստատեսության թղթակից ներկայացած ադրբեջանցի լրագրողի հարցերին է պատասխանել՝ ներկայացնելով պաշտոնական Երևանի հայտնի դիրքորոշումները ԵԱՀԿ Մինսկի խմբի լուծարման, ՀՀ Սահմանադրության և Ադրբեջանի հետ համաձայնեցված խաղաղության համաձայնագրի շուրջ:
Փաշինյանը, մասնավորապես, հայտարարել է, որ ԵԱՀԿ-ին դիմումը Մինսկի խմբի լուծարման հարցով պետք է լինի խաղաղության պայմանագրի ստորագրման հետ միաժամանակ, Հայաստանի Սահմանադրությունում չկա տարածքային պահանջ որևէ հարևանի նկատմամբ, և խաղաղության պայմանագրի՝ երկրի Հիմնական օրենքին համապատասխանության հարցը կարող է որոշել միայն երկրի Սահմանադրական դատարանը՝ պայմանագրի ստորագրումից հետո:
Ադրբեջանի արտգործնախարարության խոսնակն, ի պատասխան, հայտարարել է՝ ՀՀ վարչապետը «կրկին փորձում է մոլորեցնել միջազգային հանրությանը»։
«Նույնիսկ զինանշանը, որը հիշատակվում է Հայաստանի Սահմանադրության 21-րդ հոդվածում, արտացոլում է հարևանների նկատմամբ Հայաստանի տարածքային պահանջները»,- ասված է ադրբեջանական դիվանագիտական գերատեսչության հայտարարությունում։
ՀԱՅԵՐԵՆ
Русский
English
Դաս. հայերեն
French
