Հաղորդագրությունը, որ առկա է «հանդիպման» մասին, համառոտ է ու ստանդարտ՝ կարևոր են համարել խաղաղության պայմանագրի տեքստի համաձայնեցումը, քննարկել ընթացիկ վիճակն ու կարևոր համարել ստորագրման ուղղությամբ գործընթացի շարունակությունը: Բովանդակային որևէ այլ մանրամասն հայտնի չէ: Հայտնի չէ նաև, թե արդյոք քննարկվել է, օրինակ, Հայաստանի սահմանամերձ գյուղերի ուղղությամբ Ադրբեջանի շարունակվող կրակոցներ, կամ սահմանազատման ու սահմանագծման հարցը, ճանապարհների օրակարգը:

 

Ընդ որում` հատկանշական է, որ Ալբանիայում հանդիպմանը զուգահեռ, տարածվում է նաև Ադրբեջանի ԱԳ նախարարության հայտարարությունը, որում ոչ միայն կրկնվում է Հայաստանի Սահմանադրության վերաբերյալ հայտնի «թեզը», այլ նաև հայտարարվում, որ Հայաստանի զինանշանն էլ տարածքային հավակնություն է հարևան երկրների նկատմամբ: Ըստ ամենայնի, Բաքուն նկատի ունի Հայաստանի զինանշանի վրա Արարատ լեռան պատկերը, որը Նոյան Տապանով է: Ընդ որում, առանց Թուրքիայի չի անցել Փաշինյանի ալբանական առօրյա:

 

Տարածվել է տեսանյութ, թե ինչպես է Նիկոլ Փաշինյանի և Ալիևի հետ զրուցում Էրդողանը, ըստ ամենայնի՝ նրանց զրույց-հանդիպումից հետո: Ավելին, Նիկոլ Փաշինյանին Էրդողանը դիմում է ձեռքի պերճախոս ժեստով, հարցնելով ինչ-որ բան, հետո գլխով դրական նշան ստանալով Հայաստանի վարչապետից և դրան ի պատասխան դրական նշան անելով բթամատով: Պետք է ենթադրել, որ Էրդողանը ձեռքի՝ «ամբողջի» նշանակության տպավորություն թողնող ժեստով Նիկոլ Փաշինյանին հարց էր ուղղում Ալիևի հետ զրույցի վերաբերյալ: Հետո Էրդողանն առանձնացավ Ալիևի հետ զրույցի: Հնարավոր է, որ Թուրքիայի նախագահի այդ ժեստը առնվազն տպավորությունների առումով Փաշինյան-Ալիև շփման մասին ասում է ավելին, քան դրա մասին պաշտոնական հաղորդագրությունը