Ուկրաինան պատրաստ է հնարավորինս արագ քայլեր ձեռնարկել՝ իրական խաղաղության հասնելու նպատակով։

«Արմենպրես»-ի հաղորդմամբ՝ «Ֆեյսբուք»-ի իր էջում գրել է Ուկրաինայի նախագահ Վլադիմիր Զելենսկին։ «Խոսել եմ նախագահ Դոնալդ Թրամփի, նախագահ Մակրոնի, դաշնային կանցլեր Մերցի, վարչապետներ Սթարմերի և Տուսկի հետ։ Մենք քննարկել ենք Ստամբուլում կայացած հանդիպումը»,–նշել է Ուկրաինայի նախագահը։

Զելենսկու խոսքով՝ աշխարհի դիրքորոշումը պետք է լինի ամուր, քանի որ հակամարտության դադարեցման հարցում վճռականություն է պահանջվում։«Մեր դիրքորոշումն այն է, որ եթե ռուսները մերժեն լիակատար և անվերապահ հրադադարը և սպանությունների դադարեցումը, պետք է կիրառվեն խիստ պատժամիջոցներ։

Ռուսաստանի վրա ճնշումը պետք է պահպանվի մինչև Ռուսաստանը պատրաստ լինի դադարեցնել պատերազմը», – ընդգծել է նա։Ուկրաինայի նախագահը շնորհակալություն է հայտնել բոլոր նրանց, ովքեր օգնում են իր երկրին այս դժվարին փուլում։