ԵՐԵՎԱՆ, 26 ՕԳՈՍՏՈՍԻ, ՆՈՅՅԱՆ ՏԱՊԱՆ: Օգոստոսի 25-ի կեսգիշերին Պեկինից հայրենիք վերադարձավ 29-րդ օլիմպիական խաղերի բրոնզե մեդալակիր վանաձորցի Հրաչիկ Ջավախյանը: Նրան աղուհացով, երգով ու պարով «Զվարթնոց» օդանավակայանում դիմավորեցին Լոռվա մարզաշխարհի մարդիկ` Վանաձորի քաղաքապետի գլխավորությամբ: Մեդալակրի նվաճումը բարձր գնահատեցին եւ նրան դափնեպսակ հանձնեցին օդանավակայան ՀԱՕԿ-ի նախագահ Գագիկ Ծառուկյանը, սպորտի եւ երիտասարդության հարցերի նախարար Արմեն Գրիգորյանը, ՀՀ բռնցքամարտի ֆեդերացիայի նախագահ, գեներալ-գնդապետ Հայկ Հարությունյանը: Հ.Ջավախյանը հայաստանցի 3-րդ բռնցքամարտիկն է, ով արժանանում է օլիմպիական մեդալի: Խաղերի չեմպիոն է եղել Վլադիմիր Ենգիբարյանը (1956թ. Մելբուռն), բրոնզե մեդալակիր` Դավիթ Թորոսյանը (1972թ. Մյունխեն): Վանաձորի սպորտկոմիտեի նախագահ, ԽՍՀՄ վաստակավոր մարզիչ Գուրգեն Գեւորգյանը «ՆՈՅՅԱՆ ՏԱՊԱՆ»-ի թղթակցին հայտնեց, որ Վանաձորի քաղաքապետարանը բնակարան եւ ավտոմեքենա կնվիրի Հ.Ջավախյանին: Արժանին կմատուցվի նաեւ մարզիկի անձնական մարզիչ Գեւորգ Միսակյանին, ում նույնպես կհանձնվի բնակարան:

---