Պաղեստինյան զենքի հանձնման գործընթացը կարող է դառնալ շրջադարձային
21-08-2025 18:00:16 | Լիբանան | Քաղաքական
Պաղեստինյան ազգային անվտանգության ուժերը որոշել են սկսել Լիբանանում տեղակայված պաղեստինցիների զենքի հանձնման գործընթացը։ Տեղեկությունը փոխանցել է պաղեստինյան պաշտոնական աղբյուր։«Իրատեսակա՞ն է որոշումը» «Նոյյան Տապան»-ի հարցին պատասխանում է քաղաքական վերլուծաբան Շահան Գանտահարյանը։
Քաղաքական վերլուծաբան Շահան Գանտահարյանի խոսքով՝ կան հիմքեր ենթադրելու, որ լուրը հավաստի է։ Խնդիրը դիտարկվում է Լիբանանում միայն բանակին զենքի մենաշնորհ տրամադրելու սկզբունքի շրջանակում։
Սակայն գործընթացը չի լինելու միանշանակ և արագ․ զենքի հանձնումը նախատեսվում է փուլ առ փուլ, և այն կարող է ցանկացած պահի ընդհատվել։
Համընկնում Գազայի իրադարձությունների հետ
Հատկանշական է, որ նման որոշում կայացվում է այն պահին, երբ Իսրայելը պատրաստվում է ամբողջությամբ գրավել Գազան։ Լիբանանի համատեքստում այս քայլը ուղերձ է նաև Հըզբոլլային, որի զինաթափումն այսօր պահանջում են ոչ միայն Իսրայելը, այլև միջազգային հանրությունը՝ հատկապես ԱՄՆ-ը։ Նման պահանջ ունի նաև պաշտոնական Բեյրութը, որը միաժամանակ պնդում է իսրայելական զորքերի դուրսբերումը լիբանանյան տարածքներից։
Տարածաշրջանային ազդեցություններ
Վերլուծաբանները ենթադրում են, որ պաղեստինյան զենքի հանձնման գործընթացը կարող է առնչվել նաև Գազայում ձևավորվելիք նոր կարգավիճակին։ Դա կապվում է «երկու պետություն» բանաձևը միջազգային օրակարգից դուրս մղելու հնարավորության հետ։
ՀԱՅԵՐԵՆ
Русский
English
Դաս. հայերեն
French
