Անահիտ Մանասյանը Գեղագիտության ազգային կենտրոնի «Փոքր թատրոնում» ներկա է գտնվել «Մարի» ներկայացմանը
29-11-2025 14:38:42 | Հայաստան | Մամլո հաղորդագրություն
Մարդու իրավունքների պաշտպան Անահիտ Մանասյանը՝ «Ընդդեմ գենդերային բռնության ակտիվության 16-օրյակ» ծրագրի շրջանակում, նոյեմբերի 25-ին Գեղագիտության ազգային կենտրոնի «Փոքր թատրոնում» ներկա է գտնվել «Մարի» ներկայացմանը։ Այս մասին հայտնում են Պաշտպանի աշխատակազմից։
«Հովհաննես Թումանյանի «Մարո» ստեղծագործության մոտիվներով բեմադրված «Մարի» ներկայացումը պատմում է Հայաստանում գենդերային բռնության իրական դեպքերի մասին՝ բացահայտելով այն համակարգային խնդիրները, որոնք առկա են ոլորտում:
Այն անդրադառնում է ընտանեկան, հոգեբանական, տնտեսական, սեռական բռնությունների, վաղ ամուսնությունների, դրանց արձագանքմանն առնչվող և կանանց աշխատանքային իրավունքներին առնչվող մի շարք խնդիրների:
Մարդու իրավունքների պաշտպանը ներկայացման ավարտին հանդես է եկել խոսքով և ընդգծել հանդուրժող, համերաշխ և ապրումակցող միջավայր ունենալու կարևորությունը՝ մարդու իրավունքների պաշտպանության արդյունավետ համակարգ ունենալու և բռնության կանխարգելման տեսանկյունից:
«Ներկայացումն ամբողջությամբ նկարագրում էր բոլոր այն խնդիրները, որոնք այսօր ևս արդիական են։ Այդ առումով լրացուցիչ խոսք ասելու կարիք չեմ տեսնում: Այն ամենն, ինչը նկարագրվում է ներկայացման շրջանակներում, ցավոք, իրականություն է, և դրա դեմ պետք է պայքարել: Չափազանց կարևոր է, նաև, որպեսզի բռնության զոհ դարձած յուրաքանչյուր մարդ զգա, որ ինքը մենակ չէ, և այդ առումով մենք մեծ անելիք ունենք»,- ասել է Անահիտ Մանասյանը։
Միջոցառումն իրականացվել է «Ընդդեմ կանանց նկատմամբ բռնության կոալիցիա» և «Իրավունքի կենտրոն» ՀԿ-ների համագործակցությամբ՝ Գերմանիայի Դաշնային Հանրապետության արտաքին գործերի նախարարության աջակցությամբ»:
ՀԱՅԵՐԵՆ
Русский
English
Դաս. հայերեն
French
