1in.am  Դեկտեմբերի 2-ը կարող է բախտորոշ լինել ոչ միայն Ուկրաինայի, այլև Եվրոպայի համար: Ռուսաստանի նախագահի մամուլի քարտուղար Պեսկովն անոնսավորել է, որ «Վլադիմիր Պուտինի հետ հանդիպմանն ամերիկյան բանակցողներից կմասնակցեն միայն Ուիթկոֆը և Քուշները»: Փաստը, որ Ռուսաստանի նախագահն ուկրաինական կարգավորման հարցով բանակցություններ է վարելու Դոնալդ Թրամփի հատուկ ներկայացուցչի և վարչակազմում ոչ մի պաշտոն չունեցող փեսայի հետ, չափազանց խոսուն է և վկայում է, որ խոսքն, իրոք, ոչ այնքան իրավա-քաղաքական պայմանավորվածությունների, որքան ռուս-ամերիկյան գործարքի մասին է: Ի դեպ, նախօրեին այդ մասին գրել է Bloomberg-ը, որի մեկնաբանի հայացքով՝ Թրամփը «ձգտում է Ուկրաինայի և Եվրոպայի հաշվին նոր որակի հարաբերություններ կառուցել Ռուսաստանի հետ»:

 

Այդ միտումը դիտարկել են նաև Եվրամիությունը, եվրոպական մի շարք երկրներ, մասնավորապես՝ Ֆրանսիան և Գերմանիան: Ուիթկոֆ-Քուշներ բանագնացների Մոսկվա այցին ընդառաջ Փարիզում կայացել է Ֆրանսիայի և Ուկրաինայի նախագահների հանդիպում, որի ավարտին Էմանուել Մակրոնը հայտարարել է, որ ռուս-ուկրաինական հակամարտությունը «չի կարող կարգավորվել առանց Եվրոպայի մասնակցության»: Ուկրաինական աղբյուրները հայտնել են, որ Վլադիմիր Զելենսկին ԱՄՆ նախագահի հետ մոտակա օրերին «հանդիպում է պահանջել»: Ըստ երևույթին, նա մտադիր է Թրամփին ներկայացնել Ուկրաինայի «անվտանգության երաշխիքների փաթեթը»:

 

 

Այս համատեքստում ռուսաստանյան լրատվամիջոցները տեղեկություն են տարածել Մոսկվայում դեկտեմբերի 2-ին Ռուսաստանի Անվտանգության խորհրդի քարտուղար Շոյգու – Չինաստանի արտաքին գործերի նախարար Վան Ին հանդիպման մասին: Ըստ պաշտոնական հաղորդագրության, Շոյգուն հայտարարել է, որ «միլիտարիստական հիդրան կրկին բարձրացնում է գլուխները, բայց Ռուսաստանը և Չինաստանը Եվրոպայում և Ճապոնիայում դրանք հատելու փորձ ունեն»: Աղբյուրը Չինաստանի արտաքին գործերի նախարարից որևէ մեջբերում չի անում, միայն հղում է ՉԺՀ արտգործանախարարությանը, որի հայտարարության համաձայն Պեկինը և Մոսկվան «կարող են գլոբալ անվտանգության երաշխավոր լինել»:

 

Ըստ էության, Չինաստանի արտաքին գործերի նախարարի Մոսկվա այցը, որ տեղի է ունեցել ռուս-ամերիկյան բախտորոշ բանակցություններից առաջ, ուկրաինական կարգավորման հարցում Ռուսաստանի դիրքորոշմանն աջակցության իմաստ ունի: Պետք է նկատի ունենալ, որ ԱՄՆ և Չինաստանի առաջնորդները վերջերս հեռախոսազրույց են ունեցել, ինչին հաջորդել է Թայվանի պաշտպանության մասին Ճապոնիայի վարչապետի հայտարարությունը:

 

«Միլիտարիստական հիդրայի գլուխները հատելու» մասին Շոյգուի սպառնալի հայտարարությունն այդ առումով վերաբերելի է նաև ԱՄՆ-ին, որ Թայվանի փաստացի անկախության երաշխավորն է, Թայբեյի առևտրատնեսական և անվտանգային գործընկերը: Ճապոնիայի վարչապետն, ամենայն հավանականությամբ, հնչեցրել է այն, ինչ Վաշինգոտնը չի ցանկացել ասել իր անունից: Այս իմաստով ուկրաինական հարցում Ռուսաստանին Չինաստանի աջակցությունը կապվում է Թայվանի շուրջ հնարավոր զարգացումների հետ:

 

Անհասկանալի է, թե մի իրավիճակում, երբ Ռուսաստանը և Չինաստանը պայմանավորվում են Ասիա-խաղաղօվկիանոսյան տարածաշրջանում «ԱՄՆ գլուխը հատել», Դոնալդ Թրամփի բանագնացներն ի՞նչ գործարք են առաջարկելու Վլադիմիր Պուտինին: Արդյո՞ք Եվրոպայի ռազմավարական պարտությունը Միացյալ Նահանգների աշխարհաքաղական շահն է: Իսկ եթե դա բերի Ասիա-խաղաղօվկիանոսյան տարածաշրջանում ԱՄՆ ռազմավարական պարտությա՞ն: Թե ռուս-ամերիկյան գործարքը տարածվում է նաև Չինաստանի՞ վրա:

Նոյյան տապան  -   Ի՞նչ է գրում մամուլը