Մոտ ապագայում ինչ-որ մաս կսահմանազատենք․ Ալեն Սիմոնյան
10-12-2025 14:42:08 | Հայաստան | Ի՞նչ է գրում մամուլը
sputnik. ԱԺ նախագահը կարծում է, որ սահմանազատումից հետո հաճելի իրավիճակ կլինի։
ԵՐԵՎԱՆ, 10 դեկտեմբերի – Sputnik. Սահմանազատման օրակարգում փոփոխություն չկա։ ՀՀ ԱԺ նախագահ Ալեն Սիմոնյանն այս հայտարարությունն արեց Մարդու իրավունքների պաշտպանության միջազգային օրվան նվիրված «Էթիկական չափորոշիչները իրավահավասարության և հակախտրականության երաշխավորման ոլորտում» համաժողովից հետո ճեպազրույցի ժամանակ։
«Ինչ-որ հարցերում մենք ենք շտապում, ինչ-որ հարցերում՝ Ադրբեջանը։ Գործընթացը շարունակվում է, կարծում եմ, որ մոտ ապագայում մենք ինչ-որ մաս նույնպես կսահմանազատենք ու կունենանք այն դրական, հաճելի ու ստացված իրավիճակը, որն ունենք Կիրանցի մասում»,- նշեց Սիմոնյանը։
Հարցին, թե որ հատվածի մասին է խոսքը, ԱԺ նախագահը հստակ պատասխան չտվեց։ Նա ընդգծեց՝ ժամկետների մասին էլ դեռ ոչինչ չի կարող ասել։
Հիշեցնենք` սահմանազատման հանձնաժողովների վերջին հանդիպումը կայացել է Ադրբեջանում նոյեմբերի 28-ին։ Մինչ այդ` հունվարի 16-ի հանդիպմանը, կողմերը պայմանավորվել էին սահմանազատման համալիր աշխատանքները սկսել հյուսիսային հատվածից՝ Հայաստանի Հանրապետության, Ադրբեջանի Հանրապետության և Վրաստանի սահմանների հատման կետից։
ՀԱՅԵՐԵՆ
Русский
English
Դաս. հայերեն
French
