29-12-2025 15:59:06 | Հայաստան | Ի՞նչ է գրում մամուլը
Sputnik. Միքայել սրբազանը կշարունակի մնալ բժիշկների վերահսկողության տակ և ստանալ հետվիրահատական բուժում։
Ամենայն հայոց կաթողիկոս Գարեգին Երկրորդն այսօր այցելել է «Իզմիրլյան» ԲԿ-ում գտնվող Շիրակի թեմի առաջնորդ Միքայել արքեպիսկոպոս Աջապահյանին։ Տեղեկությունը Sputnik Արմենիային հայտնեց «Իզմիրլյան» ԲԿ-ի մամուլի և հասարակայնության հետ կապերի պատասխանատու Աննա Դեմիրճյանը։
«Միքայել սրբազանի վիճակը բավարար է գնահատվում, նա կշարունակի մնալ բժիշկների վերահսկողության տակ և ստանալ հետվիրահատական բուժում»,–ասաց Դեմիրճյանը։
Միքայել արքեպիսկոպոս Աջապահյանին վիրահատվել է դեկտեմբերի 26–ին։
Հիշեցնենք` Միքայել արքեպիսկոպոս Աջապահյանի նկատմամբ քրեական գործ հարուցվեց իշխանությունը զավթելուն, տարածքային ամբողջականությունը խախտելուն, ինքնիշխանությունից հրաժարվելուն կամ սահմանադրական կարգը բռնի տապալելուն ուղղված հրապարակային կոչերի հոդվածով։ Նա կալանավորվեց հունիսի 28–ին։
Հոկտեմբերի 3–ին առաջին ատյանի ընդհանուր իրավասության դատարանի դատավոր Արմինե Մելիքսեթյանը հրապարակեց Միքայել սրբազանի դատավճիռը. նա մեղավոր ճանաչվեց ու դատապարտվեց 2 տարվա ազատազրկման։
Պաշտպանները նոյեմբերի 13-ին վերաքննիչ բողոք են ներկայացրել առաջին ատյանի դատարանի դատավոր Արմինե Մելիքսեթյանի` հոկտեմբերի 3-ի դատավճռի դեմ և խնդրել են ամբողջությամբ բեկանել դատավճիռը, կայացնել նոր դատական ակտ՝ ճանաչել և հռչակել գերաշնորհ Միքայել (Գևորգ) Արտաշեսի Աջապահյանի անմեղությունը։ Դատական նիստը դեկտեմբերի 15–ին հետաձգվեց. սրբազանի ազատազրկման դատավճռի դեմ վերանքննիչ բողոքը կքննարկվի 2026–ի հունվարի 13–ին։
ՀԱՅԵՐԵՆ
Русский
English
Դաս. հայերեն
French
