Պապիկյանն աշխատանքից ազատել է ՊՆ-ում աշխատող բոլոր նրանց, ում զավակներն ունեն այլ երկրի քաղաքացիություն
13-01-2026 14:14:32 | Հայաստան | Ի՞նչ է գրում մամուլը
Հայկական ժամանակ. «Գաղտնիք չէ, որ մեր հասարակության մեջ արմատավորված մի վատ ավանդույթ կա․ յուրաքանչյուր «պատվախնդիր» ծնող ամեն ինչ անում է, կաշվից դուրս է գալիս, ամեն խարդախության մեջ պատրաստ է մտնել, որպեսզի արու զավակին ազատի զինծառայությունից:
Այս մասին 2025-ի ամփոփիչ ասուլիսի ժամանակ ասել է ՀՀ պաշտպանության նախարար Սուրեն Պապիկյանը՝ նշելով, որ որոշ ժամանակ այս երևույթը նույնիսկ ընկալվել է որպես սոցիալական կարգավիճակի մասին հայտարարություն։
«Սա համարում եմ ամենախայտառակ բանը, որ մեր հասարակության մեջ առկա է»,- ասել է Պապիկյանն ու տեղեկացրել, որ վերջին մեկ տարվա ընթացքում աշխատանքից ազատել է ՊՆ համակարգում աշխատող բոլոր այն ծնողներին, որոնց զավակներն ունեն այլ երկրի քաղաքացիություն։
«Անմեղության կանխավարկածը հաշվի առնելով՝ դա չեմ կարող տարածել «հիվանդություն» ունեցողների նկատմամբ, բայց ամեն դեպքում կասկածի որդը շարունակում է ինձ ճնշել, որպեսզի նրանց նկատմամբ նույնպես ուշադիր լինեմ»,-ասել է Պապիկյանը։
Նրա խոսքով՝ խնդիրը հանրային բնույթ ունի և պահանջում է համակարգային լուծումներ։
ՀԱՅԵՐԵՆ
Русский
English
Դաս. հայերեն
French
