ՀՀ ՏՆՏԵՍԱԿԱՆ ՄՐՑԱԿՑՈՒԹՅԱՆ ՀԱՆՁՆԱԺՈՂՈՎԸ ՎԱՐՈՒՅԹ Է ՀԱՐՈՒՑԵԼ
ԶԼՄ-ՆԵՐԻ ՀՐԱՊԱՐԱԿՈՒՄՆԵՐԻ ՀԻՄԱՆ ՎՐԱ
11-06-2008 18:00:00 | Հայաստան | Տնտեսություն
ԵՐԵՎԱՆ, 11 ՀՈՒՆԻՍԻ, ՆՈՅՅԱՆ ՏԱՊԱՆ: Հունիսի 11-ի նիստում ՀՀ
տնտեսական մրցակցության հանձնաժողովը վարույթ է հարուցել «Առավոտ»
օրաթերթի եւ www.panorama.am լրատվական կայքի հրապարակումների
հիման վրա, համաձայն որոնց, շուկայում ազոտական պարարտանյութը
վաճառվում է 9500-15000 դրամով` այն դեպքում, երբ պետությունը
սուբսիդիա է տրամադրում այս ապրանքի համար: Համաձայն խոշոր
տնտեսվարողների պարզաբանման, որ նրանք տվել են լրագրողներին, իրենք
պարարտանյութը վաճառում են 5050, 6200 եւ 6800 դրամով:
Ըստ «ՆՈՅՅԱՆ ՏԱՊԱՆ»-ին տրամադրած հաղորդագրության,
հանձնաժողովը վերջերս էր ուսումնասիրել ազոտական պարարտանյութերի
շուկայի կառուցվածքը եւ մայիսի 27-ի որոշմամբ «Դվին
Հոլդինգ»-«Ազոտինվեստ» ընկերություններին, որպես անձանց խումբ
համարել գերիշխող դիրք ունեցող եւ գրանցել համապատասխան ռեեստում
(«Դվին Հոլդինգ»-ը շուկայում գործող «Ազոտինվեստ»-ի հիմնադիրներից
մեկն է, ինչը, ըստ «Տնտեսական մրցակցության պաշտպանության մասին»
ՀՀ օրենքի, նշանակում է, որ այս երկու ընկերությունները անձանց
խումբ են համարվում եւ շուկայում հանդես են գալիս որպես մեկ
տնտեսվարող սուբյեկտ): «Դվին Հոլդինգ»-«Ազոտինվեստ» անձանց խումբը
գրավում է շուկայի 81,2 տոկոսը:
Հանձնաժողովը քննարկել է նաեւ «Շեն-Կոնցեռն» ընկերության
դիմումը` համակենտրոնացման մասին: «Շեն-Կոնցեռն»-ը դիմել էր
Հանձնաժողով` հայտնելով, որ իր բաժնետերերից մեկը իրեն
սեփականության իրավունքով պատկանող բաժնեմասը մտադիր է վաճառել
ընկերության մյուս երկու խոշոր բաժնետերերին: Համաձայն «Տնտեսական
մրցակցության պաշտպանության մասին» ՀՀ օրենքի, ընկերությունը
ներկայացրել է երեք խոշոր բաժնետերերի համակենտրոնացման
հայտարարագրերը` ակնկալելով ստանալ համաձայնություն նշված գործարքի
կատարման վերաբերյալ:
Հանձնաժողովը, ուսումնասիրելով ներկայացված փաստաթղթերը, եկել
է եզրակացության, որ նշված գործարքը (ձեռքերումը) կատարվում է մեկ
ընկերության շրջանակներում, ինչը ազդեցություն չի ունենա
մրցակցային դաշտի վրա եւ որոշմամբ վարույթը դադարեցրել է: