Մխիթար Հայրապետյանը կարևորել է ՏՀՏ գործատուների միության դերը տեխնոլոգիական ոլորտում
04-02-2026 19:40:29 | Հայաստան | Մամլո հաղորդագրություն
Փետրվարի 3-ին ՀՀ բարձր տեխնոլոգիական արդյունաբերության նախարար Մխիթար Հայրապետյանի մասնակցությամբ տեղի է ունեցել ՏՀՏ գործատուների միության նոր անդամներին նվիրված միջոցառում, որի շրջանակում ներկայացվել են միությանը միացած նոր կազմակերպությունները և դրանց գործունեության հիմնական ուղղությունները։
Հանդես գալով ողջույնի խոսքով՝ նախարար Հայրապետյանը կարևորել է ՏՀՏ գործատուների միության դերը տեխնոլոգիական ոլորտի կայացման և զարգացման գործում՝ այն ներկայացնելով իբրև պետություն-մասնավոր հատված արդյունավետ փոխգործակցության լավագույն օրինակներից մեկը։
Նախարարը նշել է, որ պետությունը մեծ պատասխանատվությամբ է մոտենում ոլորտային միությունների հետ համագործակցությանը։ Նրա խոսքով՝ ոլորտի կայուն և երկարաժամկետ զարգացումը հնարավոր է ոչ թե մեկմեկու գործառույթները կրկնող, այլ իրար փոխլրացնող և աջակցող մոտեցումների շնորհիվ։
Իր խոսքում նախարարը վստահեցրել է, որ ՀՀ բարձր տեխնոլոգիական արդյունաբերության նախարարությունը շարունակելու է կանգնած լինել ինչպես ՏՀՏ գործատուների միության, այնպես էլ ամբողջ տեխնոլոգիական համայնքի կողքին՝ համատեղ նախաձեռնությունների և ծրագրերի իրականացման ճանապարհին։
Միջոցառման ընթացքում միության նոր անդամները հնարավորություն են ունեցել ներկայացնելու իրենց ընկերությունների գործունեությունը, տեսլականը և զարգացման ուղղությունները։
Խոսքով է հանդես եկել նաև Armenian Innovation Foundation-ի ներկայացուցիչ Լևոն Թադևոսյանը՝ ներկայացնելով հիմնադրամի գործունեությունը և տեխնոլոգիական էկոհամակարգի զարգացմանն ուղղված նախաձեռնությունները։
ՀԱՅԵՐԵՆ
Русский
English
Դաս. հայերեն
French
