Իրանը և Ռուսաստանը մեղադրել են Starlink-ին միջազգային իրավունքի խախտման համար. Bloomberg
11-02-2026 16:29:01 | | Ի՞նչ է գրում մամուլը
1lurer.am Իլոն Մասկի SpaceX ընկերության Starlink գլոբալ կապի արբանյակային համակարգը խախտում է միջազգային իրավունքը և ջնջում է առևտրային ու ռազմական տեխնոլոգիաների միջև եղած սահմանը, հայտարարել են իրանցի և ռուս դիվանագետները ՄԱԿ-ում կայացած հանդիպման ժամանակ՝ հաղորդում է Bloomberg-ը։
Իրանի ներկայացուցիչները Վիեննայում ՄԱԿ-ի գիտական համաժողովում հայտարարել են, որ Starlink-ի «անօրինական գործունեությունը» երկրում խախտում է հանրապետության ինքնիշխանությունը և հավասարազոր է «արբանյակների առևտրային մեգախմբի չարտոնված ռազմական օգտագործմանը»։
Միևնույն ժամանակ, Ռուսաստանի ներկայացուցիչները ենթադրել են, որ SpaceX ցանցը կարող է խախտել 1967 թվականի Տիեզերքի մասին պայմանագիրը, որը վավերացրել են Միացյալ Նահանգներն ու ավելի քան 100 երկիր, ինչն արբանյակային օպերատորներից պահանջում է հաշվի առնել տիեզերական արդյունաբերության մյուս մասնակիցների շահերը։
SpaceX-ը շահագործում է մոտավորապես 9600 Starlink արբանյակի ցանց։ Տեխնոլոգիան ակտիվորեն օգտագործում են Ուկրաինայի զինված ուժերը: Փետրվարի սկզբին Ուկրաինայի կառավարության խնդրանքով SpaceX-ը միջոցներ է ձեռնարկել՝ կանխելու ռուսական զինվորականների կողմից արբանյակային կապի օգտագործումը։
Starlink-ից օգտվել են նաև Իրանի ցուցարարները։ Համակարգը դարձել է կապի հիմնական ուղի, երբ իշխանությունները երկրում անջատել են ինտերնետը։ Ըստ Bloomberg-ի՝ Starlink-ը արգելված է Իրանում, սակայն վերջին տարիներին արբանյակային կապի մոտ 50000 տերմինալ է անօրինական ներկրվել երկիր։
ՀԱՅԵՐԵՆ
Русский
English
Դաս. հայերեն
French
