Որևէ մեկը սիրուն աչքերի համար երաշխավոր չի դառնում․ ԱԳ նախարարը՝ խաղաղության երաշխավորների մասին
25-03-2026 19:00:01 | Հայաստան | Ի՞նչ է գրում մամուլը
Միջազգային հարաբերություններում որևէ երկիր սիրուն աչքերի համար երաշխավորություն չի ստանձնում։
«Արմենպրես»-ի հաղորդմամբ՝ Ազգային ժողովում կառավարության հետ հարցուպատասխանի ժամանակ այս մասին ասել է արտաքին գործերի նախարար Արարատ Միրզոյանը՝ արձագանքելով խաղաղության գործընթացում երաշխավորների թեմայի շուրջ քննարկումներին։
Միրզոյանը նշել է, որ ընդդիմությունը վերջին շրջանում ակտիվորեն առաջ է քաշում երաշխավորների թեման։
«Այս վերջին օրերին մեր ընդդիմադիր խմբակները երաշխավորացավ են կպել։ Մինչ այդ ընդհանրապես խաղաղությունը չէին ընդունում, հիմա խոսում են խաղաղության մասին, բայց՝ երաշխավորներով»,- ասել է նա։
Միրզոյանի խոսքով՝ միջազգային հարաբերություններում երաշխավորները միշտ առաջնորդվում են սեփական շահերով։
«Սառը հաշվարկների աշխարհում ոչ մեկ ոչ մեկի սիրուն աչքերի համար երաշխավորություն չի անում և նաև իր զինվորների արյունը չի թափում, ծախսերը չի անում»,- ընդգծել է նախարարը։
Նա հավելել է, որ պատմության մեջ բազմաթիվ օրինակներ կան, երբ նույնիսկ երաշխավորված և ստորագրված համաձայնությունները խախտվել են՝ երբեմն հենց այդ երաշխավորների կողմից։ Միրզոյանի գնահատմամբ՝ ներկայում առկա խաղաղությունը արդեն ապացուցել է իր կենսունակությունը՝ պահպանվելով տարածաշրջանային լարված պայմաններում։
«Խաղաղությունը կարող է պահպանվել այնքան ժամանակ, քանի դեռ այն շահավետ է երկու կողմերին»,- ընդգծել է նա։
Նախարարի խոսքով՝ Հայաստանի նպատակը Ադրբեջանի հետ փոխշահավետ համագործակցության համակարգի ձևավորումն է, որը կխթանի երկարաժամկետ խաղաղության պահպանումը։
ՀԱՅԵՐԵՆ
Русский
English
Դաս. հայերեն
French
