Տաշքենտաբնակ 12-ամյա երգչին հանձնվել է ՀՀ Սփյուռքի
նախարարության շնորհակալագիրը
16-03-2010 21:08:00 | Հայաստան | Մշակույթ
ԵՐԵՎԱՆ, 16 ՄԱՐՏԻ, ՆՈՅՅԱՆ ՏԱՊԱՆ: Հայաստանի սփյուռքի նախարար
Հրանուշ Հակոբյանը մարտի 15-ին ընդունել է Տաշքենտում բնակվող
12-ամյա երգիչ, բազմաթիվ միջազգային մրցանակների դափնեկիր Մասիս
Մինասյանին` իր ծնողների` Նեկտար եւ Շիրազ Մինասյանների, եւ
կոմպոզիտոր Անահիտ Շահզադեյանի ուղեկցությամբ:
Երկար տարիներ ապրելով Տաշքենտում, Մինասյան ամուսինները
կարողացել են իրենց զավակներին փոխանցել սերը Հայրենիքի, հայ
մշակույթի, հատկապես հայ երգարվեստի նկատմամաբ, սովորեցրել են
որդիներին խոսել անաղարտ հայերենով: Հանդիպման ժամանակ Մասիսը
կատարել է Ա.Շահզադեյանի «Մասիսն է իմ լեռը, Մասիսն եմ եւ ես»
երգը, որը նա պատրաստվում է ներկայացնել «Նոր ալիք» միջազգային
փառատոնում: Մեկ այլ երգով Մասիսը կմասնակցի «Եվրոտեսիլ»-ի
մանկական երգի մրցույթին, ինչպես նաեւ որպես անհատ-կատարող հանդես
կգա «Մեկ ազգ, մեկ մշակույթ» փառատոնի շրջանակներում:
Հ.Հակոբյանը բարձր է գնահատել օտար ափերում հայ երգը եւ
մշակույթն արժանապատվորեն ներկայացնող 12-ամյա տաղանդաշատ
պատանյակի ջանքերն ու նվիրումը: «Սիրելի Մասիս, դու ճառագում ես, եւ
քո միջի արեւը թող որ քեզ դարձնի Արարատ եւ հայ երգի դեսպանն
աշխարհում»,- մաղթել է նրան նախարարը: Հ.Հակոբյանը փոքրիկ երգչին
նվիրել է «Սովորիր մեծերից» ասույթների եւ առակների ժողովածուն, նաեւ
խորհուրդ տվել ավելի հաճախ այցելել «Հայերն այսօր» էլեկտրոնային
թերթ` ՀՀ Սփյուռքի նախարարության կողմից իրականացվող ծրագրերին
տեղեկանալու եւ մասնակցելու համար:
Մասիսին հանձնվել է ՀՀ Սփյուռքի նախարարության
շնորհակալագիրը` հայ երգարվեստի զարգացմանը, հայապահպանության եւ
Հայաստան-Սփյուռք մշակութային կապերի ամրապնդմանն ուղղված ջանքերի
եւ նշանակալի ձեռքբերումների համար:
Շնորհակալություն հայտնելով ՀՀ սփյուռքի նախարարին ջերմ
ընդունելության համար, հյուրերը նշել են, որ հանձին նորաստեղծ
գերատեսչության իրենք շատ արագ եւ արդյունավետ են տեսնում իրենց
հիմախնդիրների լուծումը Հայրենիքում: