Ընտրություններից 2 ամիս առաջ խաղի կանոնները չպետք է փոխվեն. Մանուկյանը` նախագծի մասին
07-04-2026 14:12:26 | Հայաստան | Ի՞նչ է գրում մամուլը
Sputnik. ՔՊ–ական պատգամավորը չթաքցրեց, որ այս նախագիծը շրջանառության մեջ է դրվել ընդամենը երեկ։
«Քաղաքացիական պայմանագիր» խմբակցությունը չի թաքցնում, որ «Ընտրական օրենսգրքում» փոփոխություններ կատարելու անհրաժեշտությունն իրենց մոտ առաջացել է ընդամենը մի քանի օր առաջ և այդ պատճառով որոշել են Ազգային ժողովի արտահերթ նիստի ժամանակ հրատապության կարգով` 24–ժամյա ռեժիմով, քննարկել ու ընդունել այն։ Այդ մասին այսօր Ազգային ժողովում ասաց «Քաղաքացիական պայմանագիր» խմբակցության պատգամավոր Արուսյակ Ջուլհակյանը, որը արտահերթ նիստ հրավիրելու հեղինակներից մեկն է։
Նշենք, որ ՔՊ–ի առաջարկած օրենքի փոփոխություններով արգելվում է կուսակցությունների, դաշինքների կողմից անձնանունների կիրառումը։
«Այս նախագիծն իր մեջ ներառում է երկու կոմպոնենտ` առաջինը վերաբերում է ընտրությունների օրը քվեարկության նկատմամբ վերահսկողության արգելքի համար նախատեսվող գործիքակազմի լավարկմանը, մյուսը` կուսակցությունների, դաշինքների անվանումներին, որոնք չպետք է անձնավորվեն։ Խնդիրը մի քանի օր է, ինչ ի հայտ է եկել, որին հաջորդ են քննարկումները։ Հրատապությամբ ենք բերել հարցի քննարկումը, քանի որ ապրիլի 13–ից սկսվում է կուսակցությունների և դաշինքների գրանցումը, այդ պատճառով չէինք կարողանալու հասցնել եկող շաբաթվա հերթական նստաշրջանում հարցը քննարկել»,– ասաց Ջուլհակյանը։
ԱԺ արտահերթ նիստի օրակարգում ներառված մյուս երեք նախագծերից մեկը ևս վերաբերում էր առաջիկա ընտրություններին։ Նախագծով առաջարկվում է փոփոխություններ կատարել «Տեսալսողական մեդիայի մասին» ՀՀ օրենքում, ըստ որի` ընտրությունների նախաշեմին կկարգավորվի արհեսատական բանականությամբ գեներացված բովանդակությունը. այն կմակնշվի գրառմամբ, որ դա գեներացվել է ԱԲ–ով։
Ջուլհակյանին հարց ուղղելով` «Հայաստան» խմբակցության պատգամավոր Գեղամ Մանուկյանը նշեց, որ ընդդիմադիր պատգամավորները եկել են արտահերթ նիստի, սակայն դեռ տեղյակ չեն այս փոփոխությունների մասին։
«Կա միջազգային պրակտիկա, Վենետիկի հանձնաժողովի կողմից Հայաստանին տրված խորհրդատվություն, ըստ որի` ընտրություններից առնվազն մեկ տարի առաջ խաղի կանոնները չեն փոխվում։ Հիմա որևէ մեկի համար գաղտնիք չէ, թե «Ընտրական օրենսգրքի» այս փոփոխություններն ինչին են միտված։ Ընտրություններին ընդամենը երկու ամիս է մնացել, դուք կոչում եք դա վրիպա՞կ, որը պետք է ուղղվի, սակայն դա անկյունքարային փոփոխություն է, որ առաջարկում եք»,– ընդգծեց Մանուկյանը։
Ի պատասխան Ջուլհակյանն ասաց, որ նախագիծը շրջանառության մեջ է դրվել երեկ։ Անդրադառնալով Վենետիկի հանձնաժողովի խորհրդատվությանը` ՔՊ–ական պատգամավորը չժխտեց, որ եղել է նման խորհրդատվություն, սակայն դա վերաբերում է օրենսգրքի հիմնարար սկզբունքների փոփոխություններին։
«Պատիվ ունեմ» խմբակցության ղեկավար Հայկ Մամիջանյանն իր ելույթում հայտարարեց, որ անիմաստ է այս նախագծի բովանդակության շուրջ քննարկում ծավալելը, ուստի` իրենք դեմ են քվեարկելու։
ՀԱՅԵՐԵՆ
Русский
English
Դաս. հայերեն
French
