ՊԱՂԵՍՏԻՆՑԻ ԶԻՆՅԱԼՆԵՐԸ 20 ՀՐԹԻՌ ԵՆ ԱՐՁԱԿԵԼ ԻՍՐԱՅԵԼԻ
ՈՒՂՂՈՒԹՅԱՄԲ
05-11-2008 15:43:00 | | Միջազգային
ԳԱԶԱ, 5 ՆՈՅԵՄԲԵՐԻ, ՆՈՅՅԱՆ ՏԱՊԱՆ: Գազայի հատվածից պաղեստինցի
զինյալները նոյեմբերի 5-ի առավոտյան 20-ից ավելի հրթիռ են արձակել
Իսրայելի հարավի ուղղությամբ` ի պատասխան Գազայում իրականացված
ռազմական գործողության: Այս մասին, ինչպես հաղորդում է «Նովոստի»
գործակալությունը, հայտնել է Իսրայելի պաշտպանության բանակի մամլո
ծառայության աշխատակիցը: Զոհերի եւ ավերածությունների մասին որեւէ
տեղեկություն չի հաղորդվում:
Գիշերը իսրայելական բանակը առաջին անգամ հրադադարի ընթացքում
մտել է Գազայի հատված այն թունելը ոչնչացնելու համար, որը, ինչպես
կարծում են իսրայելցիները, կարող է օգտագործվել մասշտաբային
դիվերսիայի կազմակերպման դեպքում: Փոխհրաձգության եւ օդուժի
հասցրած հարվածի հետեւանքով զոհվել են պաղեստինցի հինգ
գրոհայիններ:
Իսրայելական կողմից վիրավորվել է երեք զինվոր: Ներկա
դրությամբ գործողությունն ավարտված է: Զինվորականները հայտարարում
են, որ այն «կետային» բնույթ է ունեցել եւ ուղղված չի եղել
հրադադարի տապալմանը: