Բակո Սահակյանը ընդունել է Հայաստանի պետական ճարտարագիտական համալսարանի պատվիրակությանը
29-03-2011 18:19:13 | Հայաստան | Քաղաքական
Արցախի Հանրապետության նախագահ Բակո Սահակյանը մարտի 29-ին ընդունել է Հայաստանի պետական ճարտարագիտական համալսարանի պատվիրակությանը` ՀՀ Ազգային ժողովի փոխնախագահ, բուհի կառավարման խորհրդի նախագահ Սամվել Նիկոյանի գլխավորությամբ: Հանդիպման ընթացքում քննարկվել են բարձրագույն կրթության ոլորտում հայկական երկու պետությունների համագործակցությանն առնչվող հարցեր:
Բ.Սահակյանը բարձր է գնահատել Հայաստանի պետական ճարտարագիտական համալսարանի դերը ինչպես Արցախի բարձրագույն կրթության զարգացմանն աջակցելու, այնպես էլ հանրապետությունում տարբեր ծրագրերի իրականացման գործում: Նա կարեւորել է նաեւ հայաստանյան այդ առաջատար բուհի եւ Արցախի պետական համալսարանի միջեւ կապերի ամրապնդումը` այն համարելով երկկողմ փոխգործակցության զարգացման կարեւոր պայմաններից մեկը:
Հանդիպմանը մասնակցում էին Արցախի Հանրապետության ԱԺ փոխնախագահ Արթուր Թովմասյանը, կրթության եւ գիտության նախարար Վլադիկ Խաչատրյանը: