ՍԵՊՏԵՄԲԵՐԻՆ ԿԱՎԱՐՏՎԻ ՆՈՐ ԱՏՈՄԱՅԻՆ ԷՆԵՐԳԱԲԼՈԿԻ ԿԱՌՈՒՑՄԱՆ
ՏԵԽՆԻԿԱՏՆՏԵՍԱԿԱՆ ՀԻՄՆԱՎՈՐՄԱՆ ՄՇԱԿՈՒՄԸ
06-06-2008 22:30:00 | Հայաստան | Տնտեսություն
ԵՐԵՎԱՆ, 6 ՀՈՒՆԻՍԻ, ՆՈՅՅԱՆ ՏԱՊԱՆ: Էներգետիկայի ոլորտում ՀՀ
կառավարության քաղաքականությունը նպատակաուղղվելու է էներգետիկ
անվտանգության մակարդակի բարձրացմանը, որը ենթադրում է
էներգակիրների ներկրման ուղիների եւ էներգիայի արտադրության ձեւերի
ընդլայնում: Ինչպես հունիսի 6-ի ասուլիսում նշեց ՀՀ էներգետիկայի
եւ բնական պաշարների էներգետիկայի նախարար Արմեն Մովսիսյանը,
կարեւոր խնդիր է համարվում մասնավորապես ՀԱԷԿ-ի հին բլոկի
շահագործումից հանելը եւ նորի կառուցումը: Նախարարը հայտնեց, որ
սեպտեմբերին կավարտվի ԱՄՆ Միջազգային զարգացման գործակալության
փորձագետների կողմից ատոմային նոր էներգաբլոկի կառուցման
տեխնիկատնտեսական հիմնավորման մշակումը: Դրանից հետո կորոշվեն
հաջորդ քայլերը:
Ըստ Ա.Մովսիսյանի, ՀՀ կառավարությունը կունենա իր սեփական
մասնաբաժինը նոր ատոմային բլոկում, եւ դրա չափը կախված կլինի այն
բանից, թե որքան ներդրում կկատարի: Նախարարը նշեց նաեւ, որ այս
տարի ՀԱԷԿ-ի անվտանգության բարձրացման նպատակով ԱՄՆ-ի եւ
Եվրոմիության կողմից կտրամադրվի մոտ 13 մլն դոլար:
Ա.Մովսեսյանը տեղեկացրեց նաեւ, որ ներկայումս
հանրապետությունում գործում եի 60 փոքր ՀԷԿ-եր` տարեկան 250 մլն
կՎտ/ժամ արտադրությամբ, եւս այդքանն էլ կառուցման համար ստացել են
լիցենզիաներ: Նշվեց նաեւ, որ որոշ ընկերություններ մտադրություն
ունեն 100 ՄգՎտ հզորությամբ հողմակայաններ կառուցել: Ինչ
վերաբերում է Մեղրիի ՀԷԿ-ի կառուցմանը, ապա այն նախատեսվում է
շահագործման հանձնել 2014թ.-ին: Տարեկան մոտ 800 մլն կՎտ/ժամ
արտադրություն ապահովող այս ՀԷԿ-ի կառուցման համար կպահանջվի
240-250 մլն դոլար: Գումարը, որը կտրամադրի իրանական կողմը,
հետագայում կփոխհատուցվի էլէներգիայով: