ՄՈՏ ԱՊԱԳԱՅՈՒՄ ԿԿԱՅԱՆԱ ԲՋՋԱՅԻՆ ԿԱՊԻ ԵՐՐՈՐԴ ՕՊԵՐԱՏՈՐԻ
ՄԻՋԱԶԳԱՅԻՆ ՄՐՑՈՒՅԹԸ
03-06-2008 18:40:00 | Հայաստան | Տնտեսություն
ԵՐԵՎԱՆ, 3 ՀՈՒՆԻՍԻ, ՆՈՅՅԱՆ ՏԱՊԱՆ: Հունիսի 1-ին «Հայկական
երկաթուղի» ընկերությունն ամբողջությամբ հանձնվել է
«Հարավ-կովկասյան երկաթուղիներ»-ի կոնցեսիոն կառավարմանը: Ինչպես
հունիսի 3-ի ասուլիսում հայտնեց ՀՀ տրանսպորտի եւ կապի նախարար
Գուրգեն Սարգսյանը, կառավարիչը առաջիկայում նախատեսում է ներկրել 8
էլեկտրաքարշ:
Նախարարի խոսքերով, Իրան-Հայաստան երկաթգծի կառուցումը, ինչի
համար կպահանջվի յոթ տարի, «զուտ մտադրություն» է: Ըստ
Գ.Սարգսյանի, այդ հարցի շուրջ քննարկումներ անցկացվել են Իրանի,
Ռուսաստանի համապատասխան գերատեսչությունների ներկայացուցիչների,
ինչպես նաեւ Եվրոբանկի հետ: Նշվեց, որ հինգ տարի առաջ կատարած
ուսումնասիրությունների արդյունքում պարզվել է, որ այդ երկաթգծի
կառուցման համար կպահանջվեր մոտ 1 մլրդ դոլար, իսկ ներկայումս
շինանյութերի գնաճի հետ կապված այդ թիվը երկու անգամ աճել է:
Անդրադառնալով Հայաստանում բջջային կապի երրորդ օպերատորի
միջազգային մրցույթին, Գ.Սարգսյանը տեղեկացրեց, որ այն
կկազմակերպվի մոտ ապագայում, իսկ արդյունքները կամփոփվեն 90 օրվա
ընթացքում: Հաղթող ընկերությունը, ըստ նախարարի, կսկսի աշխատել
մրցույթից վեց ամիս հետո: