ԱՅՍ ՏԱՐՎԱ ԱՌԱՋԻՆ ԵՌԱՄՍՅԱԿՈՒՄ ԲԱԶՄԱԲՆԱԿԱՐԱՆ ՇԵՆՔԵՐԻ
ԲՆԱԿԱՐԱՆՆԵՐԻ ՄԻՋԻՆ ԳՆԵՐԸ ՆԱԽՈՐԴ ՏԱՐՎԱ ՉՈՐՐՈՐԴ ԵՌԱՄՍՅԱԿԻ ՀԱՄԵՄԱՏ
ԵՐԵՎԱՆՈՒՄ ԱՃԵԼ ԵՆ 2,5%-ՈՎ, ԻՍԿ ՄԱՐԶԵՐՈՒՄ 6,4%-ՈՎ
ԱՅՍ ՏԱՐՎԱ ԱՌԱՋԻՆ ԵՌԱՄՍՅԱԿՈՒՄ ԲԱԶՄԱԲՆԱԿԱՐԱՆ ՇԵՆՔԵՐԻ
ԲՆԱԿԱՐԱՆՆԵՐԻ ՄԻՋԻՆ ԳՆԵՐԸ ՆԱԽՈՐԴ ՏԱՐՎԱ ՉՈՐՐՈՐԴ ԵՌԱՄՍՅԱԿԻ ՀԱՄԵՄԱՏ
ԵՐԵՎԱՆՈՒՄ ԱՃԵԼ ԵՆ 2,5%-ՈՎ, ԻՍԿ ՄԱՐԶԵՐՈՒՄ 6,4%-ՈՎ
14-05-2008 19:00:00 | Հայաստան | Տնտեսություն
ԵՐԵՎԱՆ, 14 ՄԱՅԻՍԻ, ՆՈՅՅԱՆ ՏԱՊԱՆ: Այս տարվա առաջին
եռամսյակում հանրապետությունում անշարժ գույքի նկատմամբ
իրականացվել են 35 085 գործարքներ, ինչը նախորդ տարվա նույն
ժամանակահատվածի համեմատ աճել է 14,1%-ով, իսկ 2007թ.-ի չորրորդ
եռամսյակի համեմատ` 25,4%-ով նվազել: Ըստ ՀՀ կառավարությանն
առընթեր Անշարժ գույքի կադաստրի պետական կոմիտեի տվյալների, անշարժ
գույքի նկատմամբ իրականացված 12 495 օտարման գործարքների 84,2%-ը
կազմել են առքուվաճառքները, 14,8%-ը` նվիրատվությունները, 0,9%-ը`
փոխանակությունները: Անշարժ գույքի օտարման գործարքների 30,9%-ն
իրականացվել է Երեւանում: Ընդ որում, օտարված անշարժ գույքի
32,2%-ը բազմաբնակարան բնակելի շենքերի բնակարաններ են:
2008թ.-ի առաջին եռամսյակում անշարժ գույքի օտարման
գործարքների քանակը անցած տարվա նույն ժամանակահատվածի համեմատ
նվազել է 3,3%-ով, իսկ 2007թ.-ի չորրորդ եռամսյակի համեմատ`
29,8%-ով:
Առաջին եռամսյակում Երեւանում անշարժ գույքի առքուվաճառքի
գործարքների 61%-ն իրականացվել է բազմաբնակարան բնակելի շենքերի
բնակարանների նկատմամբ: Երեւանում նախորդ տարվա առաջին եռամսյակի
համեմատ 2008թ.-ի առաջին եռամսյակում բազմաբնակարան բնակելի
շենքերի բնակարանների առքուվաճառքի գործարքների քանակը նվազել է
14,9%-ով, իսկ 2007թ.-ի չորրորդ եռամսյակի համեմատ` 35,8%-ով:
Երեւանում վաճառված բազմաբնակարան բնակելի շենքերի բնակարանների
շուկայական միջին գները 2007թ.-ի չորրորդ եռամսյակի համեմատ այս
տարվա առաջին եռամսյակում 1 քմ մակերեսի հաշվարկով աճել են
2,5%-ով:
Մասնավորապես, Կենտրոն համայնքում 1 քմ մակերեսի գինը կազմել
մոտ 472,4 հազար դրամ (մոտ 1523 ԱՄՆ դոլար), Արաբկիրում` 387,6
հազար, Քանաքեռ-Զեյթունում` 298,2 հազար, Նոր-Նորքում` 259 հազար,
Ավանում` 259,4 հազար, Էրեբունիում` 260 հազար, Շենգավիթում` 269,2
հազար, Աջափնյակում` 264,5 հազար, Դավիթաշենում` 276,9 հազար,
Մալաթիա-Սեբաստիայում` 255,5 հազար, Նուբարաշենում` 145,4 հազար
դրամ:
2008թ.-ի առաջին եռամսյակում մարզերում, բացառությամբ
Երեւանի, վաճառվել են բազմաբնակարան բնակելի շենքերի 1 253
բնակարաններ, ինչը անցած տարվա նույն ժամանակահատվածի համեմատ
նվազել է 12,3%-ով, իսկ 2007թ.-ի չորրորդ եռամսյակի համեմատ`
22,4%-ով:
Մարզերում բազմաբնակարան բնակելի շենքերի շուկայական միջին
գները անցած տարվա չորրորդ եռամսյակի համեմատ այս տարվա առաջին
եռամսյակում աճել են 6,4%-ով: Մասնավորապես, 1 քմ մակերեսի գինը
Աշտարակում կազմել է 115,3 հազար դրամ, Ապարանում` 31,4 հազար,
Թալինում` 43,9 հազար, Արտաշատում` 97,5 հազար, Մասիսում` 123,5
հազար, Վեդիում` 80,4 հազար, Արարատում` 63,9 հազար, Նոր Հաճնում`
115,1 հազար , Բյուրեղավանում` 88,6 հազար, Եղվարդում` 106,8
հազար, Հրազդանում` 60,7 հազար, Ծաղկաձորում` 136 հազար,
Ջերմուկում` 121,5 հազար, Դիլիջանում` 82,5 հազար, Իջեւանում`
113,1 հազար դրամ: