ՀԱՅԱՍՏԱՆԻ ԶԲԱՂՎԱԾՈՒԹՅԱՆ ԵՎ ՏՆՏԵՍԱԿԱՆ ՔԱՂԱՔԱԿԱՆՈՒԹՅՈՒՆՆԵՐԸ
ՀԱՄԱՀՈՒՆՉ ՉԵՆ,- ԳՏՆՈՒՄ Է ՏՆՏԵՍԱԳԵՏ ԷԴՈՒԱՐԴ ԱՂԱՋԱՆՈՎԸ
01-05-2008 23:00:00 | Հայաստան | Տնտեսություն
ԵՐԵՎԱՆ, 1 ՄԱՅԻՍԻ, ՆՈՅՅԱՆ ՏԱՊԱՆ: Յուրաքանչյուր երկրի
բնակչության զբաղվածության կառուցվածքը կախված է տվյալ երկրի
տնտեսական կառուցվածքից, սակայն Հայաստանում զբաղվածության եւ
տնտեսական քաղաքականությունները համահունչ չեն: Նման կարծիք մայիսի
1-ի ասուլիսում հայտնեց տնտեսագետ Էդուարդ Աղաջանովը: Ըստ նրա,
այն, որ ՀՀ իշխանությունները ձգտում են ստեղծել գիտելիքահենք`
ինովացիոն, տնտեսություն, երկրում պետք է բերի զբաղվածության եւ
աշխատանքի կառուցվածքի փոփոխության. ինովացիոն տնտեսության
զարգացման համար երկրին անհրաժեշտ են համապատասխան մասնագետներ:
«Իսկ Հայաստանում գոյություն ունի՞ արդյոք նման մասնագիտություն,
կա՞ որեւէ բուհ, որ պատրաստում է 21 դարի տնտեսության կադրեր»,-
հարցրեց նա:
Է.Աղաջանովի դիտարկմամբ, ներկայումս ամբողջ աշխարհում առկա է
գիտելիքների հնացման խնդիր: «Աշխարհը սրընթաց զարգանում է եւ դրան
զուգահեռ հնանում են գիտելիքները»,- ասաց նա: Ըստ տնտեսագետի, այդ
առումով 45-55 տարեկանների համար շատ դժվար է լինում աշխատանք
գտնելը: Նրա գնահատմամբ, խնդրի ամենահաջողակ լուծումը տրվել է
ԱՄՆ-ում, ուր ներդրված է հետբուհական կրթության համակարգ, ինչը
հնարավորություն է տալիս նշված տարիքային խմբի մարդկանց «թարմացնել
իրենց գիտելիքները»: Իսկ Հայաստանում, ըստ Է.Աղաջանովի, այդ
ուղղությամբ պետական քաղաքականություն չի իրականացվում:
Բացի այդ, ըստ Է.Աղաջանովի, Հայաստանում առկա է աշխատատեղերի
եւ աշխատավարձերի լեգալիզացիայի խնդիր: «Մեր երկիրը յուրահատուկ է
նաեւ նրանով, որ այստեղ 85 աշխատող պահում է 100 թոշակառուի, եւ դա
այն դեպքում, երբ աշխարհի այլ երկրների համեմատ մեզ մոտ
արձանագրված է գործազրկության շատ ցածր մակարդակ` 7,1%»,- նշեց
տնտեսագետը, հավելելով, որ խնդիրը թաքնված աշխատավարձի եւ
աշխատողների մեջ է: Նա նաեւ նշեց, որ նոր աշխատատեղեր երկրում
ստեղծվում են միայն փոքր բիզնեսի միջոցով:
Անդրադառնալով մինիմալ սպառողական զամբյուղին, Է.Աղաջանովը
նշեց, որ ըստ պաշտոնական վիճակագրության, միջին անվանական
աշխատավարձը հանրապետությունում կազմում է 76,992 դրամ (մոտ 250
ԱՄՆ դոլար), որը չի կարող ապահովել մինիմալ սպառողական զամբուղի
ծավալը: Այսինքն, ըստ նրա, աշխատող մարդը նույնպես կարող է աղքատ
լինել: