ՀՀ ԿԲ-ն 0,25%-ՈՎ ԲԱՐՁՐԱՑՐԵԼ Է ՎԵՐԱՖԻՆԱՆՍԱՎՈՐՄԱՆ
ՏՈԿՈՍԱԴՐՈՒՅՔԸ` ԱՅՆ ՍԱՀՄԱՆԵԼՈՎ 6,5%
02-04-2008 18:00:00 | Հայաստան | Տնտեսություն
ԵՐԵՎԱՆ, 2 ԱՊՐԻԼԻ, ՆՈՅՅԱՆ ՏԱՊԱՆ: 2008թ.-ի ապրիլի 2-ի նիստում
ՀՀ Կենտրոնական բանկի խորհուրդը 0,25%-ով բարձրացրել է
վերաֆինանսավորման տոկոսադրույքը` այն սահմանելով 6,5%:
Ըստ ՀՀ ԿԲ-ի մամուլի ծառայության, 2008թ.-ի մարտին փետրվարի
նկատմամբ արձանագրվել է 1,4% գնաճ, որի հաշվառմամբ 12-ամսյա գնաճը
կազմել է 9,6%, ինչը շուրջ 3%-ով բարձր է նախորդ տարվա վերջում
արձանագրված մակարդակից:
ԿԲ խորհուրդը արձանագրել է, որ համաշխարհային շուկայում
ձեւավորված բարձր գնաճային ճնշումներն առաջին եռամսյակում
շարունակել են ուժգնանալ` էապես անդրադառնալով պարենային
ապրանքների ներքին գների վրա: Միաժամանակ, վերոհիշյալ
զարգացումների երկրորդային ազդեցությունները սկսում են դրսեւորվել`
հանգեցնելով ոչ պարենային ապրանքների գների եւ ծառայությունների
սակագների բարձրացմանը:
ԿԲ-ի խորհուրդը այն կարծիքին է, որ առաջիկայում գնաճային
ճնշումները պահպանվելու են եւ դրամավարկային պայմանների
աստիճանական խստացումը նպատակ ունի մեղմելու գնաճային սպասումները
եւ չեզոքացնելու նշված զարգացումների երկրորդային
ազդեցությունները: