2008 Թ.-Ի ՀՈՒՆՎԱՐԻՆ ՆԱԽՈՐԴ ՏԱՐՎԱ ՆՈՒՅՆ ԱՄՍՎԱ ՀԱՄԵՄԱՏ ՀՀ
ՊԵՏԲՅՈՒՋԵ ՊԱՐՏԱԴԻՐ ՍՈՑԻԱԼԱԿԱՆ ԱՊԱՀՈՎՈՒԹՅԱՆ ՎՃԱՐՆԵՐԻ ԳԾՈՎ
ՄՈՒՏՔԵՐԸ 12,4%-ՈՎ ԱՃԵԼ ԵՆ
10-03-2008 19:15:00 | Հայաստան | Տնտեսություն
ԵՐԵՎԱՆ, 10 ՄԱՐՏԻ, ՆՈՅՅԱՆ ՏԱՊԱՆ: 2008թ.-ի հունվարին պարտադիր
սոցիալական ապահովության վճարների գծով ՀՀ բյուջետային եկամուտները
կազմել են ավելի քան 6,2 մլրդ դրամ (մոտ 20,21 մլն ԱՄՆ դոլար),
ինչով ապահովվել է եռամսյակային ծրագրի 27,9%-ով կատարումը:
2007թ.-ի նույն ամսվա համեմատ պարտադիր սոցիալական ապահովության
վճարներն աճել են 12,4%-ով կամ 685 մլն դրամով:
ՀՀ Ֆինանսների եւ էկոնոմիկայի նախարարության լրատվական
ծառայության տվյալներով, հունվարին ստացվել են 6,1 մլն դրամի
պաշտոնական դրամաշնորհներ, որոնք մուտքագրվել են պետական
հիմնարկների արտաբյուջետային հաշիվներին:
Պետական բյուջեի այլ եկամուտները 2008թ.-ի հունվարին կազմել
են շուրջ 2 մլրդ դրամ, ինչով ապահովվել է եռամսյակային ծրագրային
ցուցանիշի 51,5%-ը: Բարձր կատարողականը հիմնականում պայմանավորված
է ՀՀ կառավարությանն առընթեր Անշարժ գույքի կադաստրի պետական
կոմիտեի ծախսերի նկատմամբ եկամուտների գերազանցումով. նախատեսված
70 մլն դրամի դիմաց ստացվել է 500,1 մլն դրամ:
2007թ.-ի նույն ժամանակահատվածի համեմատ այլ եկամուտները
նվազել են 68,6%-ով: Վերջինս պայմանավորված է 2007թ.-ին «Արմենտել»
ՓԲԸ-ի հետ կնքված հաշտության համաձայնությամբ վճարված գումարով,
որը կազմել էր 4,6 մլրդ դրամ: Առանց նշված գումարի 2007թ.-ի նույն
ժամանակահատվածի համեմատ այլ եկամուտների աճը կազմում է 20,9%, որը
հիմնականում պայմանավորված է իրավախախտումների համար կիրառվող
պատժամիջոցներից մուտքերի (50,8%), պետական սեփականություն
հանդիսացող գույքի վարձակալությունից (54,2%), ինչպես նաեւ օրենքով
եւ այլ իրավական ակտերով սահմանված պետական բյուջե մուտքագրվող այլ
եկամուտների (45,7%) գծով կատարված վճարումների աճով: