ԵՐԵՎԱՆ, 10 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Նաթելլա Լալաբեկյանը ինքնատիպ բանաստեղծուհի է, եւ նրա պոեզիան լի է իմաստնությամբ եւ զգացմունքայնությամբ: Այս մասին նշեց դրամատուրգ Կարինե Խոդիկյանը ամերիկաբնակ բանաստեղծուհու «Բազմակետեր» ժողովածուի շնորհանդեսին, որը կայացավ հոկտեմբերի 10-ին Հայաստանի Գրողների միությունում (ՀԳՄ): Շնորհանդեսին մասնակցում էին ԽՍՀՄ ժողովրդական արտիստներ Վախթանգ Կիկաբիձեն, Կոնստանտին Օրբելյանը, ՀՀ առողջապահության եւ մշակույթի նախարարները, ինչպես նաեւ պաշտոնատար այլ անձինք, արվեստագետներ: Կ.Խոդիկյանի խոսքերով, թեեւ բանաստեղծուհին ապրում է Լոս Անջելեսում, սակայն ամեն ինչ անում է, որպեսզի իր յուրաքանչյուր գրքի ծնունդը նշվի Հայաստանում: Դա վկայում է այն մասին, որ նա արմատներով իսկապես կապված է հայրենիքի հետ: Բանաստեղծուհու նախորդ գրքի հրատարակումից անցել է 6 տարի, եւ այս տարիները, ՀԳՄ-ի նախագահ Լեւոն Անանյանի գնահատմամբ, Ն.Լալաբեկյանի համար եղել են պոետական հասունության տարիներ: Դրա վկայությունը, ըստ նրա, «Բազմակետ» ժողովածուն է: «Այս հակասական դարաշրջանում Ն.Լալաբեկյանը փնտրված գրող է: Նրա պոեզիան շատ կանացի է, լի սիրով ու ջերմությամբ: Պոետական բազմաձայնության մեջ, որ այսօր բերում են օտարագիր հայազգի գրողները, Ն.Լալաբեկյանի բանաստեղեծությունները առանձնահատուկ են եւ ներկայանալի»,- նշեց Լ.Անանյանը: Միջոցառման ժամանակ Լ.Անանյանը բանաստեղծուհուն հանձնեց ՀԳՄ-ի անդամատոմս:

---