ԲԵՅՐՈՒԹ, 26 ՄԱՅԻՍԻ, ՆՈՅՅԱՆ ՏԱՊԱՆ: Լիբանանի խորհրդարանը
մայիսի 25-ին պետության ղեկավար է ընտրել երկրի զինված ուժերի
հրամանատար գեներալ Միշել Սուլեյմանին: Լիբանանի նախագահի պաշտոնը
2007թ. նոյեմբերից թափուր էր մնում ներքաղաքական հակամարտության
պատճառով` հանգեցնելով շատ սուր ճգնաժամի:
Ընտրությունները հնարավոր դարձան Արաբական պետությունների
լիգայի միջնորդության եւ Քաթարի մայրաքաղաք Դոհայում
հակամարտության կողմերի հաշտության բանակցությունների շնորհիվ:
Հնգօրյա քննարկումների արդյունքում հակառակորդները` կառավարող
կոալիցիան, որին սատարում է Արեւմուտքը, եւ ընդդիմությունը`
«Հզբոլլահ» շիա-մահմեդական շարժման գլխավորությամբ,
պայմանավորվածություններ ձեռք բերեցին նախագահի ընտրության, նոր
կառավարության ձեւավորման եւ նոր ընտրական օրենքի ընդունման
առնչությամբ: