ՄՇԱԿՈՒՅԹԻ ԲՆԱԳԱՎԱՌՈՒՄ ՀԻՄՆԱԿԱՆ ԳԵՐԱԿԱՅՈՒԹՅՈՒՆՆԵՐՆ ԵՆ
ՄՇԱԿՈՒԹԱՅԻՆ ԱՐԺԵՔՆԵՐԻ ՊԱՀՊԱՆՈՒՄԸ ԵՎ ԺԱՄԱՆԱԿԱԿԻՑ ԱՐՎԵՍՏԻ
ԶԱՐԳԱՑՈՒՄԸ
14-05-2008 22:30:00 | Հայաստան | Տնտեսություն
ԵՐԵՎԱՆ, 14 ՄԱՅԻՍԻ, ՆՈՅՅԱՆ ՏԱՊԱՆ: 2007 թ.-ի բյուջեյով
մշակույթի բնագավառում նախատեսված 16,7 մլրդ դրամն օգտագործվել
է գրեթե ամբողջությամբ: Այս մասին մայիսի 14-ին Ազգային Ժողովում
նշեց ՀՀ գլխավոր գանձապետ Ատոմ Ջանջուղազյանը:
Ըստ մշակույթի, սպորտի, երիտասարդության հարցերի նախարար
Հասմիկ Պողոսյանի, հաշվետու տարում մշակույթի ոլորտում պահպանվել
են երկու գերակայություններ` մշակութային ժառանգության
պահպանությունը եւ ժամանակակից արվեստի զարգացումը: Մի շարք
ծրագրեր են իրականացվել մշակութային կրթության ուղղությամբ:
Մշակութային ժառանգության պահպանման նպատակով տարվա ընթացքում
կատարվել են 15 հուշարձանների վերականգնման եւ 8-ի վերականգնման
նախագծման աշխատանքներ: Կառավարության պահուստային ֆոնդից
հատկացվել են գումարներ Սպիտակի երկրաշարժի 20-ամյա տարելիցի
կապակցությամբ սերբ օդաչուների հուշարձանի բարեկարգման եւ
Սարդարապատի ճակատամարտի 90-ամյակի հետ կապված Բաշ-Ապարանի
հուշահամալիրի վերականգման համար:
Հանրապետությունում մշակույթի նախարարության ենթակայությամբ
գործող 13 պետական գրադարանների համար 2007թ.-ին պետբյուջեյով
հատկացվել էր 584 մլն դրամ, որն օգտագործվել է ամբողջությամբ: Ըստ
նախարարի, անցած տարի մեկնարկել է նաեւ գրադարանների հիմնանորոգման
3-ամյա ծրագիրը: