ԲՐԱԶԻԼԻԱ, 15 ԱՊՐԻԼԻ, ՆՈՅՅԱՆ ՏԱՊԱՆ: Բրազիլիայում հայտնաբերվել է աշխարհում մեծությամբ երրորդ նավթի հանքավայրը: Այս մասին, ինչպես հաղորդում է ԻՏԱՌ-ՏԱՍՍ-ը, հայտարարել է Ազգային նավթային գործակալության տնօրեն Խարոլդո Լիման: Նա նշել է, որ տեղեկատվությունն առայժմ նախնական է եւ հաստատման կարիք ունի, սակայն ստացվել է «Պետրոբրազ» բրազիլական ազգային նավթային ընկերության աղբյուրից, որը մասնակցել է երկրաբանահետախուզական աշխատանքներին: Ըստ նրա, խոսքը «Կարիոկա» շելֆային տեղամասի խորջրյա հանքավայրի մասին է, որի պաշարները կարող են կազմել 33 մլրդ բարել: «Այն կարող է դառնալ վերջին 30 տարիներին հայտնաբերված խոշորագույն հանքավայրը, եւ այսօրվա դրությամբ` իր մեծությամբ երրորդն աշխարհում»,- ասել է Ազգային նավթային գործակալության ղեկավարը:

---