ՄԱԿ. ԿՈՍՈՎՈՆ ԴԱՐՁԵԼ Է ԹՄՐԱՎԱՃԱՌՔԻ ՀԱՄԱՇԽԱՐՀԱՅԻՆ ԿԵՆՏՐՈՆ
27-03-2008 17:21:00 | ԱՄՆ | Միջազգային
ՆՅՈՒ ՅՈՐՔ, 27 ՄԱՐՏԻ, ՆՈՅՅԱՆ ՏԱՊԱՆ: Թմրադեղերի եւ
կազմակերպված հանցավորության դեմ պայքարի ՄԱԿ-ի վարչության
զեկույցի տվյալների համաձայն, սպառնալի մասշտաբների է հասել կապը
հարավամերիկյան նարկոկարտելների եւ ալբանական մաֆիայի միջեւ:
Ինչպես հաղորդում է «Ինտերֆաքսը», փաստաթղթում հավաստվում է,
որ ալբանական մաֆիան ամենազորեղ քրեական կազմակերպությունն է
Եվրոպայում, քանի որ նա է վերահսկում հերոինի վաճառքի մեծ մասը
եվրոպական մի շարք երկրներում` Շվեյցարիայում, Հունաստանում,
Բելգիայում, Ավստրիայում, Շվեդիայում, Չեխիայում, Նորվեգիայում եւ,
վերջին ժամանակներս, Մեծ Բրիտանիայում: Ալբանցիները վերահսկում են
հերոինի արեւմտաեվրոպական շուկայի 40-75%-ը, որից ստացվող եկամուտը
հասնում է մոտ 7 միլիարդ դոլարի:
Զեկույցում նշվում է, որ ըստ Ինտերպոլի, Եվրոպոլի, ԱՄՆ-Ի
ՀԴԲ-ի տվյալների` Կոսովոն դարձել է թմրադեղերի տարածման կենտրոն,
որտեղ հատվում են համաշխարհային թմրադեղերի առեւտրի բոլոր
ուղիները: