ԱՄՆ-Ը ՌՈՒՍԱՍՏԱՆԻՆ ԱՌԱՋԱՐԿԵԼ Է ՀԵՏԵՎԵԼ ՀՀՊ ԱՇԽԱՏԱՆՔԻՆ
ԵՎՐՈՊԱՅՈՒՄ
20-03-2008 16:27:00 | Ռուսաստան | Միջազգային
ՄՈՍԿՎԱ, 20 ՄԱՐՏԻ, ՆՈՅՅԱՆ ՏԱՊԱՆ: Ամերիկացիները ի վերջո
խոստովանեցին, որ ՀՀՊ առնչությամբ Ռուսաստանի մտահոգությունները
անհիմն չեն: Այս մասին հայտարարել է ՌԴ ԱԳՆ ղեկավար Սերգեյ
Լավրովը` մեկնաբանելով Ռուսաստանի եւ ԱՄՆ-ի արտաքին քաղաքական եւ
պաշտպանական գերատեսչությունների ղեկավարների մոսկովյան
բանակցությունների արդյունքները:
Լավրովը հայտնել է, որ «ամերիկյան կողմը պատրաստ է մեզ
առաջարկել մի ամբողջ շարք վստահության ամրապնդման միջոցներ,
որպեսզի մենք կարողանանք համոզվել, որ այդ համակարգը չի գործում
մեր դեմ»: «Դրանց (այդ միջոցների) իմաստը հետեւյալն է. մենք
հնարավորություն կունենանք հետեւելու, թե ինչ է անում ռադարը եւ
ինչ վիճակում է գտնվում իրականում կալանիչների ռազմակայանը ինչպես
մարդկային գործոնի, այնպես էլ տեխնիկական միջոցների օգնությամբ»,-
պարզաբանել է Լավրովը: