ՃԱՊՈՆԻԱՅԻ ՎԱՐՉԱՊԵՏԸ ՀԱՐԱՎԱՅԻՆ ԿՈՒՐԻԼՆԵՐԸ ՀԱՄԱՐՈՒՄ Է
ՃԱՊՈՆԻԱՅԻ «ԲՆԻԿ ՀՈՂԵՐ»
07-02-2008 16:05:00 | Ճապոնիա | Միջազգային
ՏՈԿԻՈ, 7 ՓԵՏՐՎԱՐԻ, ՆՈՅՅԱՆ ՏԱՊԱՆ: Ճապոնիայի վարչապետ Յասուո
Ֆուկուդան Հարավային Կուրիլները համարում է իր երկրի «բնիկ հողերը»
եւ մտադիր է դրանց վերաբերյալ Մոսկվայի հետ վարել համառ
բանակցություններ, հաղորդում է ԻՏԱՌ-ՏԱՍՍ-ը:
«Ռուսաստանը կարեւոր հարեւան երկիր է, որի հետ մեր շահերը
համընկնում են տարբեր խնդիրների առնչությամբ: Ես մտադիր եմ
այսուհետ ավելի լուրջ ուշադրություն դարձնել նրա հետ
հարաբերությունների ամրապնդմանը: Դրանք ավելի բարձր մակարդակի
բարձրացնելու համար անհրաժեշտ է խաղաղ պայմանագիր կնքել` լուծելով
հյուսիսային տարածքների խնդիրը»,- հայտարարել է Ճապոնիայի
վարչապետը:
«Կառավարությունը վճռականորեն առաջ կմղի բանակցությունները
դրա վերաբերյալ` ելնելով իր հիմնարար ուղեգծից, որպեսզի կնքի խաղաղ
պայմանագիր` լուծելով չորս հյուսիսային կղզիների` մեր երկրի այդ
բնիկ հողերի պատկանելության հարցը»,- ավելացրել է Յասուո
Ֆուկուդան: